Arbil
هەولێر - AA
سەرەڕای ئەگەری پەسەندکردنی دەستلەکارکێشانەوەی عادل عەبدولمەهدی و هەڵوەشاندەنەوەی حکوومەتی ناوەندی لە لایەن پەرلەمانەوە، بڕیارە ئەمڕۆ یەکشەممە، شاندی حکوومەتی هەرێمی کوردستان بۆ واژووکردنی کۆتایی لەسەر رێککەوتتی نێوان هەرێم و حکوومەتی ناوەند سەردانی بەغدا بکات.
هەفتەی رابردوو شاندەکەی هەرێمی کوردستان کە هەریەکە لە وەزیری دارایی حکوومەتی هەرێمی کوردستان ئاوات شێخ جەناب، وەزیری پلاندانان دارا رەشید سەرپەرشتییان دەکرد، سەردانی بەغدایان کردبوو و راگەیەندرا کە رێککەوتێکی بەرایی لەسەر پێدانی بەشە بوودجەی حکوومەتی هەرێمی کوردستان لە کۆی گشتی بوودجەی عێراق بۆ ساڵی 2020 کراوە.
بەپێی رێککەوتنە بەراییەکەی نێوان هەرێم و بەغدا، هەرێم لەسەرێتی رۆژانە 250 هەزار بەرمیل نەوت رادەستی بەغدا بکات و لەبەرامبەردا شایستە داراییەکانی حکوومەتی هەرێم بە قەرزەکانی رابردووشەوە، لەسەر بەغدا دەبێت بۆ رەوانەی هەرێمی کوردستانی بکات.
بەپێی زانیارییەکانی نیوەڕۆی ئەمڕۆ شاندەکەی حکوومەتی هەرێم دەگاتە بەغدا و لەگەڵ بەرپرسانی عێراق کۆدەبنەوە و ئەگەری زۆرە واژووی کۆتایی لەسەر رێککەوتنەکە بکرێت.
سەردانەکەی شاندی حکوومەتی هەرێم لەکاتێکدایە کە خواستی دەستلەکارکێشانەوەی عادل عەبدولمەهدی ئەمڕۆ یەکشەممە لە پەرلەمان تاوتوێ دەکرێ و دەنگی لەسەر دەدرێ و لەئەگەری پەسەندکردنی، ئەوە حکوومەتی ناوەدنی عێراق هەڵدەوەشێتەوە و حکوومەتێکی کاربەڕێکەر یان هەڵبژاردنی پێشوەختە لە ئەگەر بەهەێزەکانی کایەی سیاسی عێراق دەبن.
لەبارەی چارەنووسی رێککەوتنی حکوومەتی هەرێم و بەغدا لەدوای دەستلەکارکێشانەوەی سەرۆکوەزیرانی عێراق، عادل عەبدولمەهدی، وەزیری هەرێم بۆ کاروباری پەیوەندییەکانی نێوان هەرێم و بەغدا، خالید شوانی لە لێدوانێکدا رایگەیاندبوو، ئهگهر ئهوان رێكبكهون لەگەڵ حکوومەتدا رێكدهكهون نەوەک لەگەڵ کەسەکاندا و گوتی: "عادل عەبدولمەهدی تائێستا سەرۆکوەزیرانی عێراقە، پێش رووداوهكان ناکەوین، بەڵام ئێمە ئەوەی پەیوەست بێت بە رێککەوتنەکەمانەوە بەردەوام دەبین لە دانوستانەکانمان، تا ئەو لێکتێگەیشتنانەی هەمانە بیگوازینەوە بۆ رێککەوتنی کۆتایی".