سەرۆکی ئیسرائیل گانتسی بۆ پێکھێنانی حکوومەتی نوێ راسپارد

قودس ـ AA

ئەمڕۆ چوارشەممە، سەرۆکی ئیسرائیل، رویڤین ریڤلین بەفەرمی سەرۆکی ھاوپەیمانی شین ـ سپی، بینی گانتس ـ ی راسپارد بۆ پێکھێنانی کابینەی نوێی حکوومەتی ئیسرائیل.

ریڤلین دوای ئەوەی یاداشتی پێکھێنانی حکوومەتی نوێی رادەستی گانتس کرد، لە لێدوانێکیدا بۆ رۆژنامەوانان رایگەیاند کە پێویستە لەسەر لایەنە سیاسییەکان لە داواکارییەکانیان بێنە خوارەوە و ئاسانکاری بکەن لەبەردەم پێکھێنانی حکوومەتی نوێ.

ھەروەھا گوتی:" پلانێکم پێشنیار کردووە بە ئامانجی رێگاخۆشکردن بۆ پێکھێنانی حکوومەتێکی یەکگرتوو".

لەلای خۆیەوە، بینی گانتس بەڵێنیدا بە ھەوڵدان بۆ پێکھێنانی حکوومەتێکی ئیتیحادی لیبراڵی.

گانتس ئاماژەی بەوەش کرد، ھەر کەس و لایەنێک ھەوڵ بۆ ھەنگاونانی ئیسرائیل بۆ قۆناغی سێیەمی ھەڵبژاردن بدات و تەنھا بەرژەوەندییە کەسییەکانی خۆیانیان لەبەرچاو بێت( وەک ئاماژەیەک بۆ بنیامین ناتانیاھۆ) ئەوە بەرەو کۆتایی ھەنگاو دەنێت و لەسەر نەخشەی سیاسی کۆتایی دێت.

گانتس پێشتر گەشبینی خۆی نیشاندابوو بە پێکھێنانی حکوومەتی نوێ لە وادەی دیاری کراوی خۆیدا.

رۆژی رابردوو سەرۆکی ئیسرائیل رایگەیاند ، دوای ئەوەی ھیچ لایەنێکی پەرلەمان، تێبینیان لەسەری نەبووە، گانتس بۆ پێکھێنانی حکوومەتی نوێ رادەسپێرێت.

راسپاردنی سەرۆکی شین ـ سپی، دوای ئەوە دێت سەرۆکوەزیرانی پێشووی ئیسرائیل، بنیامین ناتانیاھۆ شکستی ھێنا لە ھەوڵی پێکھێنانی کابینەی نوێی حکوومەت.

گانتس کە خاوەنی ٣٣ کورسی کنێستە، بۆ پێکھێنانی حکوومەتی نوێ تەنھا ٢٨ رۆژی لەبەردەمدایە و پێویستە لەو ماوەیەدا ھاوپەیمانێتییەکی نوێ پێک بھێنێ کە ژمارەی کورسییەکانیان بگاتە ٦١ کورسی، تاوەکو دەنگی پێویست بھێنێت بۆ متمانەدا بە کابینەی نوێی حکوومەت.

لە ئەگەری شکستھێنانی گانتس بۆ پێکھێنانی حکوومەتی نوێ، ئەوکات ئیسرائیل بەرەو قۆناغی سێیەمی ھەڵبژاردن ھەنگاو دەنێت.

بەگوێرەی ئەنجامی فەڕمی ھەڵبژاردنی ئیسرائیل، ھاوپەیمانی شین ـ سپی ( ٣٣ کورسی لە کۆی ١٢٠ کورسی کنێست) ، لیکۆد ( ٣١ کورسی) ، لیستی ھاوبەشی عەرەبی (١٣ کورسی) یان بەدەستھێناوە.