سەدر گەڕایەوە نەجەف و چووە نێو خۆپیشاندەرانەوە

عێراق ـ AA

سەرکردەی رەوتی سەدر، موقتەدا سەدر ئەمڕۆ سێشەممە دوای گەڕانەوەی لە ئێرانەوە بۆ نەجەف، لە یەکێک لە گۆڕەپانەکانی شارەکە لەگەڵ خۆپیشاندەرانی ناڕازیی بەشداری خۆپیشاندانەکانی کرد.

بەگوێرەی راگەیەندراوی نوسینگەی سەدر کە کۆپییەکی دەست ئانادۆڵو کەوتووە، سەدر لە گۆڕەپانی سەدریین لە شاری نەجەف چووەتە نێو خۆپیشاندەرانەوە.

گەڕانەوەی سەدر بۆ عێراق و بەشداری کردنی لە خۆپیشاندانەکان، لە کاتێکدایە خۆپیشاندان و ناڕەزایەتییەکانی دژی حکوومەت تا دێت زیاتر دەبێت.

سەرچاوەیەک کە نەیویست ناوی خۆی ئاشکرا بکات، بۆ ئاژانسی ئانادۆڵوی راگەیاند کە سەدر دەیەوێت لەنزیکەوە ئاگاداری دوایین پێشھاتەکان بێت، کەوا چاوەڕوان دەکرێت وڵاتەکە بەمزووانە پێشھاتی سیاسی نوێ بەخۆوە ببینێت.

موقتەدا سەدر رۆژی رابردوو لە تویتێکدا داوای لە سەرۆکوەزیرانی عێراق، عادل عەبدولمەھدی کرد بچێتە بەردەم پەرلەمان و داوای ھەڵبژاردنی پێشوەخت بکات.

بەڵام ئەو داوایە لەلایەن سەرۆکوەزیرانی عێراق رەتکرایەوە و راگەیەندرا کە راگەیاندنی ھەڵبژاردنی پێشوەخت لەدەسەڵاتی پەرلەمانە نەوەک سەرۆکوەزیران.

لە رۆژی ھەینی رابردووەوە شەپۆلێکی تری ناڕەزایی و خۆپیشاندانەکان لە عێراق سەریان ھەڵداوەتەوە، بەو ھۆیەوە تائێستا زیاتر لە ٨٠ کوژراو و ھەزاران برینداری لێکەوتووەتەوە.

ئەوەش دووەم شەپۆلی ناڕەزایی خۆپیشاندەرانی عێراقییە، پێشتر و لەسەرەتای ئەم مانگە بۆ ماوەی ھەفتەیەک خۆپیشاندەران لە بەغدا و چەند شارێکی تری خوارووی عێراق درێژەیان بە خۆپیشاندانەکان دا، لەئاکامی رووبەڕووبوونەوەی خۆپیشاندەران و ھێزە ئەمنییەکانیش لەو خۆپیشاندانانەدا ١٥٧ کەس کوژران.

داواکارییەکی سەرەکی خۆپیشاندەران، گۆڕاوە بۆ لەکارخستنی حکوومەت و سیستمی سیاسی ئێستای ئەو وڵاتە کە بە گوتەی ئەوان لەسەر بنەمای گەندەڵی و پشکی لایەنەکان دامەزراوە.