دوایین ئاماری تەقینەوەكەی ناوچەی سەدر 100 کوژراو و بریندار

بەپێی گوتەی سەرچاوەیەكی پزیشكی، لەو تەقینەوەیە كە ئەمڕۆ بە رێگەی ئۆتۆمبێلێكی بۆمبڕێژكراو لە نێو بازاڕێكی میللی لە ناوچەی سەدر لە رۆژهەڵاتی بەغدا رووی دا 28 كەس كوژران و زیاتر لە 72ی دیكەش بریندار بوون.

كاربەدەستی فریاگوزاری لە نەخۆشخانەی ئیمام عەلی حەمەد جاسم لە لێدوانێكدا دوایین ئاماری قوربانیانی تەقینەوەكەی ئەمڕۆی ناوچەی سەدر لە رۆژهەڵاتی بەغدا دایە ئاژانسی ئانادۆڵو و رایگەیاند، بەپێی دوایین ئامار كە لە بەردەستیاندایە، لەو تەقینەویە 28 كەس كوژراون و زیاتر لە 72ی دیكەش برینداربوون.

بە گوتەی جاسم، بە بەشداری هێزەکانی هاوبەش و سوپا و هاووڵاتییان توانراوە كوژراوان و بریندارەكانی تەقینەوەكە بگوازرێنەوە بۆ نەخۆشخانە نزیكەكان.

هەتا ئێستا هیچ لایەنێك بەرپرسیاریەتی خۆی لە ئەنجامدانی تەقینەوەكەی ئەمڕۆی ناوچەی سەدر رانەگەیاندووە.

زۆر جار فەرماندە سەربازییەكانی عێراق، دەستی تۆمەت لە ئەنجامدانی ئەو تەقینەوانە كە لە شاری بەغدا و پارێزگاكانی دیكە روودەدەن، بۆ رێكخراوی داعش درێژ دەكەن.