دیداری نێوان سەرۆكی هەرێمی كوردستان و سەرۆكوەزیرانی عێراق

هەولێر - AA

لە هەوڵیری پایتەختی هەرێمی کوردستان، سەرۆكی هەرێم مەسعود بارزانی پێشوازی لە سەرۆكوەزیرانی عێراقی حەیدەر عەبادی و شاندێكی یاوەری كرد.

بە پێی ماڵپەڕی سەرۆکایەتی هەرێمی کوردستان، لە دیدارەكەدا باس لە دوایین پێشڤەچوونە مەیدانییەكانی ئۆپەراسیۆنی ئازادكردنی موسڵ لە ڕۆژهەڵات و ڕۆژئاوای شاری موسڵ كرا و هەردوولا پیرۆزبایی سەركەوتنە سەربازییەكانی دژی داعشیان لە یەكتر كرد و پێزانینیان هەبوو بۆ هەماهەنگیی نێوان هێزی پێشمەرگەی كوردستان و هێزەكانی سوپای عێراقی و جەختیش لە پتەوتركردنی ئەو هەماهەنگییە كرا لەپێناو مسۆگەركردنی سەقامگیری و ڕووبەڕووبوونەوەی شێوازەكانی دیكەی تیرۆر لەدوای تێكشكاندنی داعش.

بە پێی ئەم هەواڵە، هەر لەو دیدارەدا قۆناغی دوای داعش و ڕووبەڕووبوونەوەی ڕەهەندەكانی دیكەی هزری تیرۆر تاوتوێ كرا، هەروەها ڕۆشناییش خرایە سەر بارودۆخی سیاسیی ناوچەكە.

لە کۆتایی هەواڵەکدا هاتووە "پەیوەندییەكانی نێوان هەولێر و بەغدا و پڕۆسەی سیاسیی عێراق تەوەرێكی دیكەی ئەم كۆبوونەوەیە بوو".