بەرھەم ساڵح: "پێویستە مافی سەرجەم پێکھاتەکانی کەرکووک دەستەبەر بکرێت"

ھەولێر ــ AA

سەرکۆماری عێراق، بەرھەم ساڵح رایگەیاند کە گرنگە مافی سەرجەم پێکھاتەکانی کەرکووک دوور لە پەراوێزخستن، جیاکاری و سەپاندنی سیاسەتی ئەمری واقع دەستەبەر بکرێت.

نووسینگەی راگەیاندنی سەرۆکایەتی کۆماری عێراق لە راگەیەنراوێکدا ئاماژەی بەوەداوە کە ئەمڕۆ چوارشەممە، بەرھەم ساڵح لە کۆشکی سەلام لە بەغدا لەگەڵ شاندی کەسایەتییەکانی قەزای داقوق و گوندی بەشیر سەربە پارێزگای کەرکووک کۆبووەتەوە.

بەپێی راگەیەنراوەکە لە کۆبوونەوەکەدا سەبارەت بە رەوش و گوزەرانی خەڵکی کەرکووک گفتوگۆکراوە و لەوبارەیەوە جەختکراوەتەوە لە گرنگیی بەھێزکردنی ئاسایش، ئارامی و ئاشتی کۆمەڵایەتی لە کەرکووک، ھەروەھا جەختکراوەتەوە لە پێویستی کۆتایی ھێنان بە دیاردەکانی دەستدرێژی و پەراوێزخستن و دۆزینەوەی چارەسەری بنەڕەتی بۆ کێشەکان بەپێی خواستی ھەموو پێکھاتە رەسەنەکانی کەرکووک و لەوبارەیەوە سەرکۆماری عێراق، بەرھەم ساڵح گوتی:

"گرنگە مافی سەرجەم پێکھاتەکانی کەرکووک دوور لە پەراوێزخستن، جیاکاری و سەپاندنی سیاسەتی ئەمری واقع دەستەبەر بکرێت".

لە راگەیەنراوەکەدا ئەوەیش خراوەتەڕوو کە لای خۆیانەوە ئەندامانی شاندەکە روونکردنەوەیەکی وردیان سەبارەت بە رەوشی قەزای داقوق و گوندی بەشیر خستووەتەڕوو و لەوبارەیەوە بەرھەم ساڵح داواکردووە کە کێشە ھەڵپەسێردراوەکانی کەرکووک بەشێوەیەکی دادپەروەرانە چارەسەر بکرێت، ھاوکات جەختیکردووەتەوە کە لەنزیکەوە چاودێری وردی رەوشی کەرکووک دەکات و ھەوڵەکانیشی بۆ کەمکردنەوەی ئاستەنگەکان و چارەسەرکردنی گرفتەکان کۆتایی ھێنان بە نەھامەتییەکانی خەڵکی کەرکووک دەخاتەگەڕ، بەجۆرێک ببێتە مایەی دەستەبەرکردنی پاراستنی ئاسایش و مافی ھاووڵاتییان و دابینکردنی پێداویستیی ژیان بۆ خەڵکی کەرکووک.