ئەمریکا سزای بەسەر ١٧ ھاووڵاتی سعوودیە سەپاند

واشنتۆن - AA

ئیدارەی ئەمریکا بە تۆمەتی تێوەگلان لە پرسی کوشتنی رۆژنامەنووس، جەمال خاشقچی لە کۆنسوڵخانەی سعوودیە لە ئیستانبوڵ، سزای بەسەر ١٧ ھاووڵاتی سعوودی سەپاند، کە راوێژکاری سەرەکی شازادەی جێنشین، سعوود ئەلقەحتانی و سەرکۆنسوڵی سعوودیە لە شاری ئیستانبوڵ، محەمەد ئەلکاتیب-یش لە نێویاندایە.

بەپێی ئەو راگەیەندراوەی لە وەزارەتی خەزێنەی ئەمریکا بڵاوکراوەتەوە لە چوارچێوەی یاسای بەرپرسیارێتی مافەکانی مرۆڤ، ناوی ژمارەیەک ھاووڵاتی سعوودی خستە لیستی رەشەوە کە دەستیان لە کوشتنی خاشقچیدا ھەبووە.

بەم پێیەش ئیدارەی واشنتۆن راوێژکاری سەرەکی شازادەی جێنشین، سعوود ئەلقەحتانی، سەرکۆنسوڵی سعوودیە لە شاری ئیستانبوڵ، محەمەد ئەلکاتیبی و جێگرەکەی، ماھیر موترەب و لە پاڵ ئەمەش، سەڵاح توبەیگی، میشال ئەلبۆستانی، نایف ئەلعاریفی، محەمەد ئەلزەھرانی، مەنسوور ئەباحوسێن، خالد ئەلعوتەیبی، عەبدولعەزیز ئەلحەوساوی، وەلید ئەلسەھری، سائر ئەلحەربی، فەھد ئەلبەلەوی، بەدر ئەلعوتەیبی، مستەفا ئەلمەدەنی، سایف ئەلقەحتانی و تورکی ئەلسەھری خستە لیستی رەشەوە.

لە چوارچێوەی بڕیارەکەی ئەمریکا، سامانی گشت ئەو ناوانەی خراونەتە لیستی رەشەوە لە ئەمریکا بلۆک دەکرێ و پەیوەندی بازرگانی ئەو کەسانەش لەگەڵ دامەزراوەکانی ئەمریکا قەدەغە کرا.