کۆبوونەوەی یەکێتی و پارتی بە ئامادەبوونی بارزانی دەستی پێکرد

هەولێر - AA

لە مەکتەبی سیاسی یەکێتیی نیشتمانیی کوردستان، بە ئامادەبوونی سەرۆکی هەرێمی کوردستان، مەسعود بارزانی کۆبوونەوەی پارتی دیموکراتی کوردستان و یەکێتیی نیشتمانیی کوردستان دەستی پێکرد.

بڕیاروایە لە کۆبوونەوەکەدا گفتوگۆ لەبارەی کۆبوونەوەکانی چەند رۆژی رابردوو لەگەڵ لایەنە سیاسییەکان بکرێت و دەرەنجامەکان بخرێنەڕوو.

رۆژی دووی ئەم مانگە لە کۆبوونەوەکەی پارتی و یەكێتیدا بڕیاردرا ئەمساڵ گشتپرسی ئەنجامبدرێت و شاندێکی هاوبەش بۆ ئەم مەبەستە پێکهات، تاوەكو ئێستا ئەوشاندە هاوبەشە لەگەڵ یەكگرتوو، كۆمەڵ، بزووتنەوە، حزبی شیوعی، سۆسیالیست، زەحمەتکێشان، 11 حزبی تورکمانی کۆبوونەتەوە.

هەفتەی رابردووش بۆ ئەم مەبەستە شاندەکە لەگەڵ کۆنسوڵ و نوێنەری وڵاتان لە هەرێمی کوردستان کۆبوونەوە.

جێگەی ئاماژەیە رێوشوێنێکی ئەمنی توند گیراوەتەبەر و بڕیار وایە دوای کۆبوونەوەکەش کۆنگرەیەکی رۆژنامەوانی ئەنجام بدرێت.