پێشێلکاریی ئاگربەست لە رۆژھەڵاتی حەلەب لە لایەن رژێمی ئەسەدەوە

حەلەب - AA

سوپای رژێمی ئەسەد و میلیشیا شیعەکانی ژێر کۆنترۆڵی ئێران پێشێلکاری لە ئاگربەستەکەی رۆژھەڵاتی حەلەب دەکەن و درێژەدا بە بۆردومانکردنی ئەو گەڕەکانە دەدەن کە دەیان ھەزار خەڵکی سڤیلی لێ دەژین.

بەپێی زانیارییەکانی پەیامنێری ئاژانسی لە ناوچە گەمارۆدراوەکانی حەلەب، دوای ئەوەی دوێنێ ئاگربەست راگەیەندرا، ئەمڕۆ بەیانی میلشیا شیعەکان و رژێمی ئەسەد ئاگربەستەکەیان پێشێل کرد و بە تۆپ و رۆکێتەوە بۆردومانی گەڕەکی سوکەری، سەڵاحەدین، ئەمرییە و چواریانی پردی حەجیان کرد.

ھاوکات فڕۆکە جەنگییەکانی رژێمی ئەسەد بە بۆمبی ھێشوویی ھێرشیان کردە سەر گەڕەکی سوکەری لە کاتێدا خەڵکەکە بۆ راگواستنەوە ئامادەبوون و لە ئەنجامدا دوو ھاووڵاتی سڤیل کوژران و نزیکەی ١٠٠ی دیکەش بریندار بوون.

لە بەرامبەردا ھێزەکانی ئۆپۆزسیۆنی سووریا رایگەیاند کە ئامادەکارییان لە بەرامبەر پێشڕەوییەکانی ھێزەکانی رژێم کردووە.

-میلشیاکان رێگەیان بە تێپەڕبوونی بریندارەکانیان نەدا

ھاووڵاتییەکەی رۆژھەڵاتی حەلەب بەناوی محەمەد عەبدوڵڵا لە لێدوانێکی بۆ پەیامنێری ئاژانسی ئانادۆڵو، ئاماژەی بەوە دا کە دوو رۆژ لەمەوبەر لە ئەنجامی ھێرشێکدا ماڵەکەی داڕما و راشیگەیاند ھەر بەھۆی ھێرشەکە چوار لە ئەندامی خێزانەکەی بریندار بوون کە تەندروستی ھەندێکیان ناجێگیرە.

محەمەد عەبدوڵڵا گوتیشی: "ئەگەر بۆ نەخۆشخانە نەگوازرێنەوە و چارەسەری پزیشکی وەرنەگرن، رەنگە بمرن. دوێنێ رێککەوتنێک بۆ گواستنەوەی بریندارەکان کرا. ئێمە بریندارەکانمان سواری ئۆتۆمبێل کرد و لە ژێر باراندا ماوەی شەش کاتژمێر میلشیا شیعەکانی سەر بە ئێران رێگەیان بە تێپەڕبوونمانیان نەدا و دووبارە گەڕاینەوە".

ئەو ھاووڵاتییەی رۆژھەڵاتی حەلەب داوای کرد لە ئێستادا با تەنھا رێگە بە تێپەڕبوونی بریندارەکان بدرێت.

بە نێوەندگیری تورکیا و بە سەرۆکایەتی رووسیا کاتژمێر ٧ی ئێوارەی دوێنێ سێشەممە ئاگربەست لە نێوان ھێزەکانی رژێمی بەشار ئەسەد و ھێزەکانی ئۆپۆزسیۆن راگەیەنرا و ھێرشەکان راگیران.

بەپێی ئاگربەستەکە پێشبینی دەکرا، ھاووڵاتییانی سڤیل و ئۆپۆزسیۆنی چەکدار ناوچەکە گەمارۆدراوەکان بەجی بھێڵن. لە ھەنگاوی یەکەمیشدا برینداران و دواتریش ھاووڵاتییانی مەدەنی و ئۆپۆزسیۆنی چەکدار لەژێر چاودێری ئەمنییدا بەرەو پارێزگای ئیدلب بەڕێ بکەون. بەڵام میلشیا شیعەکانی ژێر کۆنترۆڵی ئێران و سوپای رژێمی ئەسەد لە یەکەم ھەنگاودا رێگەیان بە تێپەڕبوونی بریندارەکان نەدا و بەرەبەیانی ئەمڕۆش دەستیان بە پێشێلکردنی ئاگربەستەکە کرد.