ھێرشی رژێمی ئەسەد بۆ سەر یەکەی نیشتەجێ لە دیمەشق

دیمەشق

لە ئاکامی ھێرشی فڕۆکە جەنگییەکانی سوپای سووریا بۆ سەر یەکەیەکی نیشتەجێ لە ناوچەی کەفر بەتنەی سەر بە دیمەشقی پایتەخت، نۆ کەس کوژران کە حەوتیان منداڵن و دەیان کەسی دیکەش بریندار بوون.

بەپێی ئەو زانیارییانەی پەیامنێری ئاژانسی ئانادۆڵو لە بەرپرسانی بەرگری شارستانی شارەکە دەستی کەوتووە، فڕۆکەکانی سوپای سووریا ھێرشێکی بۆ سەر ناوچەی کەفر بەتنە لە رۆژھەڵاتی غوتا لە دیمەشق ئەنجام دا.

بەرپرسانی بەرگری شارستانی شارەکە ئاماژە بەوە دەکەن کە لە ھێرشەکەدا نۆ کەس کوژران کە حەوتیان منداڵن و دەیان کەسی دیکەش بریندار بوون و راشیانگەیاندووە کە تیمەکانی بەرگری شارستانی بە ئامێری کار ھەوڵی دەرھێنانی بریندارەکان لە ژێر خانووە رووخاوەکان دەدەن.

شایەتحاڵێک بە ناوی عیسا ئەبو شێخ رایگەیاند ئەمڕۆ بەھۆی ھێرشی فڕۆکە جەنگییەکانی رژێم، ژمارەیەکی زۆر لە خەڵکی سڤیل کوژران کە زۆربەیان منداڵن.

ئەبو شێخ ئاماژەی بەوەش دا کە باوکێک تەرمی منداڵی خۆی لە ژێر خانووەکێک دەرکردووە و راشیگەیاند بریندارەکان لە لایەن تیمەکانی تەندروستی و بەرگری شارستانی شارەکە بۆ نەخۆشخانەکانی سەحرا لە ناوچەکە گواسترانەوە.