حەسەکە - AA

وەزارەتی ناوخۆی سووریا بڵاوی کردەوە، لە کۆی ١٢٠ ئەندامی ڕێکخراوی تیرۆریستیی داعش کە لە گرتوخانەی شاری شەدادی پارێزگای حەسەکە لە باکووری ڕۆژهەڵاتی وڵاتەکە هەڵاتبوون، ٨١ تیرۆریستیان دەستگیر کراون.

لە چەند ڕاگەیاندراوێکی یەک لە دوای یەکدا، وەزارەتی ناوخۆی سووریا سەرەتا ئاماژەی بەوە کرد کە ڕێکخراوی تیرۆریستیی یەپەگە/سەدەگە بەرپرسیارە لە ئازادکردنی تیرۆریستانی داعش.

دواتر وەزارەتەکە ڕایگەیاند: "دوای هەڵاتنی ١٢٠ تیرۆریستی داعش لە گرتوخانەی شەدادی، یەکەکانی سوپای سووریا و یەکەکانی ئۆپەراسیۆنی تایبەتی سەر بە وەزارەتی ناوخۆ چوونەتە ناو شاری شەدادی".

لە ڕاگەیاندراوەکەدا هاتووە: "یەکەکانی سوپا و وەزارەتی ناوخۆ ئۆپەراسیۆنێکی بەرفراوانی گەڕان و پشکنینیان لە شاری شەدادی و دەوروبەری ئەنجام دا. لە ئۆپەراسیۆنەکەدا ٨١ تیرۆریستی داعش دەستگیرکران. گەڕان بەدوای ئەندامەکانی دیکەی داعشدا بەردەوامە".

سوپای سووریا ئێوارەی دوێنێ ڕایگەیاندبوو کە ڕێکخراوی تیرۆریستیی یەپەگە/سەدەگە، تیرۆریستانی ڕێکخراوی داعشی لە گرتوخانەی شاری شەدادی ئازاد کردووە.

ڕێککەوتنی ئاگربەست و تێکەڵبوونی تەواوەتی کە لە نێوان حکوومەتی دیمەشق و یەپەگە/سەدەگە واژوو کرا، چەندین بڕگە لەخۆ دەگرێت وەک: کشانەوەی تەواوەتی ڕێکخراوەکە لە پارێزگاکانی ڕەققە و دێرازۆر لە ڕۆژهەڵاتی ڕووباری فورات، ڕادەستکردنی دامەزراوە گشتییەکانی حەسەکە بە دەوڵەت، ڕادەستکردنی تەواوی دەروازە سنوورییەکان و سەرچاوەکانی وزە بە دەسەڵاتی ناوەندی و تێکەڵبوونی ئەندامانی یەپەگە/سەدەگە بە شێوەی تاکەکەسی بۆ ناو هێزە ئەمنییەکان.