وەزیری دەرەوەی عێراق لە بڕۆکسل لەگەڵ سکرتێری گشتیی ناتۆ کۆبوویەوە

ھەولێر – AA

وەزیری دەرەوەی عێراق، فوئاد حوسێن لە میانی سەردانەکەیدا بۆ بڕۆکسل لەگەڵ سکرتێری گشتیی ناتۆ، یانس ستۆڵتنبێرگ کۆبوویەوە.

وەزارەتی دەرەوەی عێراق لە راگەیەندراوێکدا ئاماژەی بەوەداوە کە لە میانی کۆبوونەوەکەدا، پەیوەندییەکانی نێوان عێراق و ناتۆ، ھەروەھا رەوشی ئەمنیی ناوچەکە تاوتوێ کراوە.

وەزیری دەرەوەی عێراق، فوئاد حوسێن ھەوڵەکانی ناتۆی بۆ پاڵپشیکردن لە ھێزە ئەمنییەکانی عێراق بە تایبەتی لە کاتی شەڕی دژبە رێکخراوی تیرۆریستیی داعش بەرز نرخاندووە، جەختی کردووەتەوە لەسەر گرنگی بەردەوامی جێبەجێکردنی بەرنامەی نێردەی ناتۆ بۆ پێشکەشکردنی راوێژ، مەشق و راھێنان بە ھێزە ئەمنییەکانی عێراق.

لای خۆیەوە سکرتێری گشتیی ناتۆ، یانس ستۆڵتنبێرگ پەرۆشی ناتۆی لە بەردەوامی جێبەجێکردنی بەرنامەی مەشق و راھێنان بە ھێزە ئەمنییەکانی عێراق نیشانداوە و جەختی کردووەتەوە لەسەر ئەوەی کە ناتۆ ئامادەییە لە ھاریکاریکردن لەگەڵ حکوومەتی عێراق بەردەوامبێت.

نێردەی ناتۆ لە عێراق لەڕیگای ٥٠٠ کارمەندی خۆیەوە لە ساڵی ٢٠١٨وە، پاڵپشتی مەشق و راھێنان پێشکەش بە ھێزە ئەمنییەکانی عێراق دەکات، ئەوەیش لە پێناو بەدیھێنانی سەقامگیریی و شەڕی دژبە تیرۆر و بەرگرتن لە دووبارە سەرھەڵدانەوەی داعش لە عێراق.