هێرشەکانی ئیسرائیل لە ١٢٨هەمین ڕۆژی خۆیدا دەیان کوژراو و برینداری لێ کەوتەوە

ئیستانبوڵ - AA

بە درێژایی شەوی ڕابردوو هێرشەکانی سوپای ئیسرائیل بۆ سەر کەرتی غەززەی گەمارۆدراو بەردەوام بوون و بە هۆیەوە دەیان فەڵەستینی کوژران و بریندار بوون.

هێرشەکانی سوپای ئیسرائیل کە بووەتە هۆی کۆچی زۆرملێ و برسێتی خەڵکی غەززە لە ١٢٨هەمین ڕۆژی خۆیدا بەردەوام بوو.

ئاژانسی هەواڵی فەرمی فەڵەستین (WAFA) بڵاوی کردەوە، سوپای ئیسرائیل چەند ناوچەیەکی لە دێربەلەح و ڕەفەح بە چڕی بۆردومان کردووە.

لە هێرشەکاندا ژمارەیەکی زۆر فەڵەستینی کە بەشی زۆریان ژن و منداڵ بوون کوژراون.

سەرچاوە ناوخۆییەکان ڕایانگەیاندووە کە بە هۆی بۆردومانی ماڵێک لە ڕۆژهەڵاتی ڕەفەح، بە لایەنی کەم ٢٥ کەس کوژراون.

ئەو سەرچاوانە ڕایانگەیاندووە کە، لە میانی شەو و ڕۆژی ڕابردوودا بە هۆی هێرشەکانی سوپای ئیسرائیل ٤٢ کەس کوژراون.

فڕۆکە جەنگییەکانی ئیسرائیلیش ئەمڕۆ بەیانی شارۆچکەی خان یونس'یان بە چڕی بۆردومان کرد و هاوکاتیش بە تۆپ ناوەندی غەززە کرایە ئامانج.

بەهۆی هێرشەکانی ئیسرائیلەوە کە لە ٧ی تشرینی یەکەمی ٢٠٢٣ەوە دەستی پێکردووە، ٢٨ هەزار و ٦٤ فەڵەستینی کوژراون و ٦٧ هەزار و ٦١١ کەسیشی بریندارن.