ئەنقەرە - AA

لە فەڕەنسا بەهۆکاری ئەمنیی بەکارهێنانی ئەپڵیکەیشنی نامە ناردنی Tchap، کە وڵاتەکە خۆی پەرەیپێداوە، بۆ کارمەندانی حکوومی لەوانە وەزیرەکان کرایە کارێکی ناچاری.

بەپێی هەواڵێکی ڕۆژنامەی لی فیگارۆ (Le Figaro)، حکوومەتی فەڕەنسی بەهۆکاری ئەمنیی ئەپڵیکەیشنەکانی نامە ناردنی وەک تێلێگرام و واتسئاپی لە کارمەندانی حکومەت قەدەغە کردووە.

بەگوێرەی ڕێنماییەکی گشتیی کە حکوومەت بڵاویکردووەتەوە، ئەپڵیکەیشنی Tchap کە لەلایەن بەڕێوەبەرایەتی دیجیتاڵی نێوان وەزارەتەکان (Dinum)ەوە پەرەیپێدراوە، خزمەت بە دابینکردنی پەیوەندییەکی پارێزراو لە نێوان کارمەندانی حکوومەتدا دەکات.

لە ڕێنماییە گشتییەکەدا ئاماژە بەوە کراوە ئەپڵیکەیشنەکانی وەک واتسئاپ و تێلێگرام گەرەنتی ئەمنیی سەرەکی دابین ناکەن، لەبەرئەوە بەکارهێنانی Tchap بەسەر هەموو کارمەندانی حکوومەتدا، لەوانە وەزیرەکان کراوەتە کارێکی ناچاری.

هەروەها لە ڕێنماییە گشتییەکەدا داوا لە کارمەندانی حکوومەت کراوە تا یەکی ئەیلوول ئەپڵیکەیشنی Tchap دابمەزرێنن.