پاریس - AA

مۆزەخانەی بۆن فراگۆنارد (Fragonard) لە پاریس کە بە پایتەختی بۆن ناسراوە، لە کاتێکدا زانیاری بە سەردانکەرانی دەدات لە بارەی ئەوەی بە درێژایی سەدەکان چ بۆنێک و چ شووشەیەکی بۆن بەکارهاتوون و بۆن چۆن دروست دەکرێت، شوێنی هەمیشەیی گوڵی تورکیش لەنێو ئەو بۆنانەدا نیشان دەدات کە لە سەرانسەری جیهانەوە لە بۆنە فەرەنسییەکاندا بەکاردەهێندرێن.

لە کاتێکدا شاری گراس لە باشووری فەڕەنسا جۆرە جیاوازەکانی گوڵی تێدا بەرهەمدەهێندرێت و پێشەنگە لە بەرهەمهێنانی بۆندا، مۆزەخانەی بۆن فراگۆنارد لە پاریسی پایتەخت، سەردانکەرانی بە گەشتێکی مێژوویی بۆندا دەبات لە ڕابردووەوە تا ئەمڕۆ.

ئەو کەسانەی سەردانی مۆزەخانەکە دەکەن، دەتوانن زانیاری دەربارەی ئەوە بەدەستبهێنن کە لە سەردەمە جیاوازەکاندا چ جۆرە بۆن و شووشەیەکی بۆن بەکارهاتووە و، چ جۆرە زەیتێکی بنەڕەتی بۆ ئەمانە بەکارهاتووە.

لە دیمانەیەکدا لەگەڵ ئاژانسی ئانادۆڵو، بەڕێوەبەری کلتوور و پەیوەندییەکانی کۆمپانیای بۆن فراگۆنارد (Maison Fragonard)، شارلۆت ئوربێن و ڕێبەری مۆزەخانەی بۆن فراگۆنارد، نازان ئۆزارسلان باسیان لە مێژووی مۆزەخانەکە و ئەو گۆڕانکارییانە کرد کە بە تێپەڕبوونی کات بەسەر کلتووری بۆندا هاتووە.

بەڕێوەبەری کلتوور و پەیوەندییەکانی کۆمپانیای بۆن فراگۆنارد، شارلۆت ئوربێن ڕایگەیاند: "لە کۆندا باوەڕ وابوو بۆنی ناخۆش نەخۆشی دەگوازێتەوە، لەبەرئەوە خەڵکی بۆ پاراستنی خۆیان لە بۆنی ناخۆش و نەخۆشییەکان، شتێکیان پێ بوو بە ناوی 'پۆماندەر' (تۆپی بۆن) لەسەر پشتێن یان مەچەک یان ملیان دەیانبەست".

هەروەها ڕێبەری مۆزەخانەی بۆن فراگۆنارد، نازان ئۆزئارسلان ڕایگەیاند: "لە ڕۆمانیا و بولگاریا گوڵی زۆر جوان هەن، بەڵام گوڵی تورکی هەمیشە سێ هەنگاو لە پێشەوەیە".