ئەنقەرە - AA

فەرماندەیی ناوەندیی هێزەکانی ئەمریکا (سێنتکۆم)، بانگه‌شه‌ی ئەوەی کرد ئەو دەنگۆیانەی باس لەوە دەکەن لە شاری لامەرد-ی ئێران مەدەنییەکان کراونەتە ئامانج، بێبنەمان.

گوتەبێژی سێنتکۆم، تیم هاوکینز، لە ڕاگەیاندراوێکدا باسی له‌وه‌ كرد لێکۆڵینەوەیان لەو هەواڵانەی هەندێک دەزگای ڕاگەیاندن کردووە کە دەڵێن هێزەکانی ئەمریکا لە ٢٨ی شوباتدا هێرشیان كردووه‌ته‌ سه‌ر هۆڵێکی وەرزشی و ناوچەیەکی نیشتەجێبوون لە شاری لامەرد-ی ئێران، ئه‌وه‌شی خسته‌ڕوو كه‌ ئەو تۆمەتانە بێبنەمان.

گوتیشی: "هێزەکانی ئەمریکا لە یەکەم ڕۆژی ئۆپەراسیۆنەکەدا هێرشیان نەکردووەتە سەر شاری لامەرد یان هەر ناوچەیەکی دیکە کە ٣٠ میل (نزیکەی ٤٨ کیلۆمەتر) لێیەوە دوور بێت. لەو دیمەنە ڤیدیۆییانەی لەلایەن دەزگاکانی ڕاگەیاندنەوە بڵاوکراونەتەوە مووشەکی پێکانی وردە (PrSM) نابینرێت. درێژیی یەک مووشەکی PrSM ١٣ پێیە (نزیکەی چوار مەتر). ئەو مووشه‌كه‌ی لە ڤیدیۆکەدا پیشان دەدرێت، دوو ئەوەندەی ئەوە درێژە و لەگەڵ قەبارە و شێوەی مووشەکی کروزی هویزه-ی ئێرانیدا دەگونجێت. هێزەکانی ئەمریکا بە پێچەوانەی ڕژێمی ئێران کە زیاتر لە ٣٠٠ جار هێرشی کردووەتە سەر شوێنە مەدەنییەکانی وڵاتانی دراوسێ، مەدەنییەکان ناکاتە ئامانج".

ڕۆژنامەی زی نیویۆرک تایمز، لە هەواڵێکیدا کە به‌ پشت به‌ستن بە شیکاری بینراو و ڕای شارەزایانی چەک بەستووه‌، ئاماژە بەوە کراوە لە یەکەم ڕۆژی هێرشەکاندا مووشەکی PrSM بەر هۆڵێکی وەرزشی و قوتابخانەیەکی نزیکی کەوتووە و بووەتە هۆی گیانلەدەستدانی لانی کەم ٢١ کەس.