رزگار کردنی گوندێك لە باشووری مەخموور

هێزەكانی سوپای عێراق، ئۆپەراسیۆنێكیان بۆ رزگاركردنەوەی گوندەكانی باشووری قەزای مەخموور لە ژێر دەستی چەكدارانی داعش ئەنجامدا و توانیان گوندێك رزگار بكەنەوە.

ئەفسەر لە سوپای عێراق موقەدەم عەبدولرەحمان جبووری سەبارەت بە ئۆپەراسیۆنەكەی ئەمڕۆی سوپای عێراق گوتی: "بەیانی ئەمڕۆ هێزەکانی سوپای عێراق هێرشێکیان بۆ سەر چەكدارانی داعش لە گوندی كەبەرۆك لە باشووری قەزای مەخموور ئەنجامدا و تاکو ئێستاش شەڕ لە نێوان هێزەكانی سوپا و چەكدارانی داعش بەردەوامە".

جبووری هەروەها گوتی: " لە دوێنێ‌ ئێوارەوە هێزەكانی سوپای عێراق ئامادەكارییەكانی بەهەماهەنگی لەگەڵ هێزەكانی هاوپەیمانی نێودەوڵەتیی بۆ رزگاركردنی گوندی كەبەرۆك دەستپێكردووە".

بەپێی زانیارییەكانی ئەفسەرە سەربازییەكە، لە شەوی رابردووە ، فڕۆكەكانی هاوپەیمانان و هێزەكانی عێراق بە چڕی پێگەكانی چەكدارانی داعشیان لە گوندی كەبەرۆك بۆردوومان كردووە و ئەمڕۆش هێزەكانی سوپا توانیان لە پاش رزگاركردنی بچنە نێو گوندەكەوە".

هەر بە گوتەی عەبدلرەحمان جبووری لە ئاكامی شەڕ و پێكدادانەكان لەو ناوچەیە 18 چەكداری داعش كوژران و ژمارەیەکی دیکە بریندار بوونە و لە بەرامبەریشدا سێ‌ سەربازی عێراقی برینداربوونە.

جبووری ئاماژە بەوەشدەكات، بەهۆی بوونی ژمارەیەک بۆمب و مینەكان كە چەكدارانی داعش لەو ناوچەیە چاندوویانە، هێزەكانی عێراق بە سیستی پێشڕەویی دەكەن.

بەر لە چەند رۆژێك، هێزەكانی سوپای عێراق بە پشتیوانی فڕۆكەكانی هاوپەیمانان توانیان گوندی مەهانە كە دەكەوێتە تەنیشت گوندی كەبەرۆك لە باشووری قەزای مەخموور رزگار بكەنەوە.