حەلەب.. بەهۆی بۆردومانی رژێم هەشت كەس كوژران

بەگوتەی سەرچاوەیەك لە هێزەكانی بەرگریی شارستانی، فڕۆكەكانی جەنگیی رژێم لە ناو شاری حەلەب باكووری سووریا، چەند گەڕەكێكیان بۆردومان كرد كە بەهۆیەوە هەشت كەس كوژران.

سەرچاوەكە كە نەیویست ناوی ئاشكرا بكرێت بە ئاژانسی ئانادۆڵوی راگەیاند، فڕۆكەكانی جەنگیی رژێم لەو بۆردومانانەدا گەڕەكەكانی "فێردەوس، ساڵحین، كلاسە"یان كردە ئامانج و لە ئاكامدا هەشت كەس كوژران و 20 کەسی دیكەش بریندار بوون كە لەناویاندا منداڵ و ئافرەتیش هەن. هەروەها سەرچاوەكان لە نێو حەلەبەوە ئەوەیان ئاشكرا كرد كە هەر بەهۆی بۆردومانەكانەوە، ئاگری گەورە لە ماڵ و دوكان و ئۆتۆمبێلەكان كەوتووە كە ئەمەش تیمەكانی ئاگركووژێنەوە سەربە بەرگریی شارستانی ناچار كرد دەستبەجێ‌ بگەنە شوێنی بۆردومانەكان و ئاگرەكە بكووژێننەوە.

هاوكات لەگەڵ ئەم بۆردومانەدا بۆ سەر شاری حەلەب، شەڕەكان لە نێوان هێزەكانی ئۆپۆزسیۆن و رژێم لە دەوروبەری ئەو شارە تا دێت توند دەبێت.