ترەمپ کۆبوونەوەکەی خۆی لەگەڵ پوتین ھەڵوەشاندەوە

واشنتۆن - AA

سەرۆکی ئەمریکا، دۆناڵد ترەمپ رایگەیاند کە کۆبوونەوەکەی خۆی لەگەڵ سەرۆکی رووسیا، ڤلادمیر پوتین لە وڵاتی ئەرجەنتین ھەڵوەشاندووەتەوە.

ترەمپ پێش بەڕێکەوتنی بۆ ئەرجەنتین بەمەبەستی بەشداری لە لووتکەی G20، تویتێکی لە ھەژماری تایبەتی خۆی لە تۆڕی کۆمەڵایەتی تویتەر بڵاوکردەوە.

ترەمپ جەختی لەوە کردەوە کە رووسیا کەشتی و کارمەندەکانی سەر بە ئۆکراینای رادەست نەکردووەتەوە و گوتیشی: "لە چوارچێوەی بیرکردنەوەم بەوەی کە ئەمە دەبێتە باشترین شت بۆ ھەموو لایەنە پەیوەندیدارەکان، بڕیارمدا کۆبوونەوەکەم لەگەڵ سەرۆکی رووسیا، ڤلادیمیر پوتین لە ئەرجەنیتن ھەڵبوەشێنمەوە".

ترەمپ گوتیشی: "لەگەڵ چارەسەرکردنی ئەو کێشەیە، ھیوادارم ئەمە ببێتە لووتکەیەکی مانا بەخش".

سەرۆکی ئەمریکا، دۆناڵد ترەمپ لە لێدوانێکی تایبەتدا لەگەڵ رۆژنامەی واشنتۆن پۆست لەماوەی ئەم ھەفتەیە رایگەیاندبوو کە داوای "راپۆرتی تەواو"ی لە ئەنجوومەنی ئاسایشی نیشتمانی ئەمریکا پەیوەندیدار بە ئەو پێشھاتانەی لە نێوان ئۆکراینا و رووسیا روویانداوە، کردووە".

ترەمپ راشیگەیاند کە بڕیاری کۆبوونەوە یان کۆنەبوونەوەی لەگەڵ پوتین لە لووتکەی G20 لە ئەرجەنتین، دوای بینینی ئەو راپۆرتە دەدات.

ترەمپ گوتیشی: "بەپێی ئەم راپۆرتە ھەڵسوکەوت دەکەم. لەوانەشە ئەو کۆبوونەوەیە ئەنجام نەدرێ".