ئەنقەرە - AA

سەرۆکی ئەمریکا، دۆناڵد ترەمپ ئاماژەی بەوە کرد سەرۆکوەزیرانی ھیندستان، ناریندرا مۆدی دڵنیایی پێداوە کە دەستبەرداری کڕینی نەوت لە ڕووسیا دەبن و ئەمەش کۆتاییھێنان بە جەنگ لە ئۆکراینا ئاسانتر دەکات.

لە کۆنگرەیەکی ڕۆژنامەوانییدا کە لە کۆشکی سپی بەڕێوەچوو، ترەمپ ھەڵسەنگاندنی بۆ پەیوەندییەکان لەگەڵ ھیندستان کرد کە بەھۆی ھاوردەکردنی نەوت لە ڕووسیا گرژییان تێکەوتبوو.

ترەمپ ناڕەزایی لە بارەی بەردەوامبوونی جەنگی ڕووسیا-ئۆکراینا دەربڕی و ڕایگەیاند: "کڕینی نەوت لەلایەن ھیندستانەوە لە (ڕووسیا)، منی دڵخۆش نەدەکرد. ئەمڕۆ (مۆدی) منی دڵنیا کردەوە لەوەی کە نەوت لە ڕووسیا ناکڕن".

سەرۆکی ئەمریکا ترەمپ، جەختی لەسەر ئەوە کردەوە کە ناتوانرێت لەناکاو کۆتایی بە ھاوردەکردن بھێنرێت و پڕۆسەکە بە ھێواشی بەرەوپێش دەچێت، بەڵام لە ماوەیەکی نزیکدا تەواو دەبێت.

ترەمپ باسی لەوە کرد کە بە دەستبەرداربوونی ھیندستان لە کڕینی نەوت لە ڕووسیا، ھەوڵەکانی نێوبژیوانی لە جەنگی ڕووسیا-ئۆکراینا ئاسانتر دەبن و، ڕایگەیاند: "ئێستا دەبێت دڵنیا بین کە چینیش ھەمان کار دەکات".