ترەمپ دژی راگرتنی فرۆشتنی چەکە بە سعوودیە بەھۆی رووداوەکەی خاشقچی

واشنتۆن - AA

سەرۆکی ئەمریکا، دۆناڵد ترەمپ لەبارەی بانگھێشتی لایەنەکان بە راگرتنی ھاوکارییە سەربازییەکان بۆ سعوودیە تا ئاشکراکردنی رووداوەکەی رۆژنامەنووس، جەمال خاشقچی گوتی: "ھەنگاوێکی لەم جۆرە، بریندارمان دەکات".

ترەمپ لەبارەی بێسەروشوێنبوونی رۆژنامەنووسی ئۆپۆزسیۆنی سعوودی، جەمال خاشقچی لە دوای چوونی بۆ کۆنسوڵخانەی سعوودیە لە شاری ئیستانبوڵ لە ٢ی تشرینی یەکەم، وەڵامی پرسیاری رۆژنامەنووسانی دایەوە.

لە دوای پرسیاری ئەوەی کە ژمارەیەک سیناتۆری ئەمریکا داوای راگرتنی ھاوکاری سەربازییان بۆ سعوودیە کردووە، تا ئاشکرابوونی رووداوی بێسەروشوێنبوونی خاشقچی، ترەمپ گوتی: "ھەنگاوێکی لەم جۆرە، بریندارمان دەکات".

ترەمپ راشیگەیاند کە خاشقچی ھاووڵاتی ئەمریکا نییە و تەنھا بە ڤیزەی ئەمریکا لە وڵاتەکەیەتی، ترەمپ لەبارەی رووداوەکەی خاشقچی گوتیشی: "ھیچ خۆشحاڵ نین، بە ھیچ شێوەیەک".

لەلایەکی دیکەش کۆمیتەی کاروباری دەرەوەی ئەنجوومەنی پیرانی ئەمریکا داوای لە ترەمپ کردبوو کە لە چوارچێوەی یاسایی بەپرسیارێتی مافی مرۆڤ، لێکۆڵینەوە لەبارەی چارەنووسی خاشقچی دەستپێبکات.