"ئامانجی راستەقینەی پوتین پارچە پارچە کردنی ئەورووپایە"

یاریزانی رووسی بەناوبانگ لە بواری یاری شەترەنجدا گاری كاسپارۆڤ كە وەك كەسایەتێكی ئۆپۆزسیۆنی رووسیا ناوی دەركردووە، ئاماژە بەوە دەكات كە ئامانجی پوتین پارچە پارچە کردنی ئەورووپایە و ئێستا ئەو خواستەی ناشارێتەوە.

كاسپارۆڤ لەمیانی بەشداری كردنی لە كۆڕبەندی رووسیای ئازاد كە لە ڤیلنیوسی پایتەختی لیتوانیا رێكخرا، گوتەیەكی پێشكەش كرد و رەخنەی توندی لە سیاسەتەكانی سەرۆكی رووسیا ڤلادیمێر پوتین گرت.

ناوبراو رایگەیاند كە پوتین ئامانجێتی ئەورووپا پارچە پارچە بكات و، هەروەك هۆكاری كۆچی پەنابەران و دروست كردنی قەیرانی پەنابەرانی بۆ هێرشەكانی رووسیا و رژێمی سووریا گەڕاندەوە لەو وڵاتەدا.

كاسپارۆڤ ئاماژەی بەوەدا كە رووسیا بە مەبەست خوازیارە دۆخی ئێستای ئەورووپا تێك بدات و ناتۆ لاواز بكات و گوتی: "ئەگەری زۆر كەمە كە جەنگ دژی وڵاتانی ناتۆ هەڵگیرسێت، چونكە مۆسكۆ دەزانێت ناتۆ وەڵامی سەربازی دەداتەوە".

كاسپارۆڤ رایگەیاند كە بە مردنی بۆریس نەمتسۆڤ، رووسیا دوایین سیاسەتمەداری ئۆپۆزسیۆنی خۆی لەدەست دا و گوتی: "رووسیا وەك وڵاتێكی دیكتاتۆری فاشیست بەڕێوەدەبرێت، ناتوانی رەخنە لە پوتین بگری، ئەمە بەدڵنیاییەوە ناكرێت، نەمتسۆڤ تا دوا هەناسەی بڕوای بەوە بوو ، بۆیە باجەكەیشی دا".