ئازەربایجان: "لە شەڕی قەرەباخ دوو هەزار و ٨٤١ سەربازمان کوژران"

باكو - AA

وەزارەتی بەرگریی ئازەربایجان رایگەیاند، لە شەڕی کۆنتڕۆڵکردنەوەی قەرەباخ لەژێر دەستی ئەرمینیادا، دوو هەزار و ٨٤١ سەربازی وڵاتەکەی کوژراون.

وەزارەته‌كه‌ لە راگه‌یه‌نراوێكدا ئاشکرایشی کردووە، ٦٤ سەربازی دیکەیان تاوەکو ئێستا بێسەرو شوێنن.

لە راگه‌یه‌نراوه‌كه‌دا ئەوە روونکراوەتەوە کە پێشتر رایانگەیاندبوو، ژمارەی سەربازە کوژراوەکانیان گەیشتووەتە دوو هەزار و ٨٢٣ سەرباز و ئاماژە بەوەشدراوە کە ژماره‌یه‌ك تەرمی دیکە دۆزراونەتەوە بەبێ ئەوەی ناسنامەیان ئاشکرا کرابێت بەمەش ژمارەی کوژراون بەرزبوویەووە بۆ دوو هەزار و ٨٤١ سەرباز.

رۆژی ٢٧ی ئەیلوولی ٢٠٢٠، سوپای ئازەربایجان ئۆپەراسیۆنی کۆنتڕۆڵکردنەوەی خاکە داگیراوەکانی لە هەرێمی قەرەباخ دەستپێکرد.

دوای ٤٤ رۆژ لە شەڕ و رووبەڕووبوونەوە، سەرۆکی رووسیا، ڤلادیمیر پوتین لە ١٠ی تشرینی دووەمی ٢٠٢٠ رایگەیاند، ئازەربایجان و ئەرمینا گەیشتوونەتە رێککەوتن بۆ راگرتنی شەڕ لە نێوانیاندا.