پڕۆسەی پاککردنەوەی تۆماری دەنگدەران تەواو نەبووە

هەولێر - AA

لەگەڵ نزیکبوونەوەی وادەی هەڵبژاردنەکان، ژمارەی تۆماری دەنگدەران لە کۆمسیۆنی باڵای سەربەخۆی هەڵبژاردن و راپرسی، مشتومڕێکی زۆری لێکەوتووەتەوە و بەڕێوەبەری گشتی داتاکانیش لەو دەزگایە پێی وایە دەزگاکانی راگەیاندن بابەتەکەیان زیاد لە پێویست گەورە کردووە چونکە چاوەڕێی ئەنجامی پاککردنەوەی تۆمارەکە ناکەن.

بەڕێوەبەری گشتی داتاکان لە کۆمسیۆنی باڵای سەربەخۆیی هەڵبژاردن و راپرسی، کاروان جەلال لە لێدوانێکی بۆ ئاژانسی ئانادۆڵو گوتی: "ماوەیەک بەر لە ئێستا ژمارەیەک ئامادەکاریمان کردبوو دوای ئەوەی کە کۆمەڵێک بڕیار لە کۆمسیۆن دەرچوو، چونکە بڕیاربوو مانگی ١١ هەڵبژاردن ئەنجام بدرێت، بەڵام بەهۆی درێژکردنەوەی تەمەنی پەرلەمانەوە ئەوا کاتەکە دواخرا و پێشبینی دەکەین کە ئەو کۆبوونەوەیەی لە نێوان سەرۆکایەتی پەرلەمان و ئەنجوومەنی وەزیران و کۆمسیۆنی باڵای سەربەخۆی هەڵبژرادن و راپرسی ئەنجام دەدرێت، ئەوا وادەی بەڕێوەچوونی هەڵبژاردنەکان دەستنیشان بکات، چونکە تا ئێستا دیارینەکراوە و ئێمە لە ئامادەکارییەکانی خۆمان بەردەوامین".

سەبارەت بە پاککردنەوەی تۆماری دەنگدەرانیش، کاروان جەلال گوتی: "ئەو بابەتە زیاد لە پێویست گەورەکراوە، بێگومان ئەو لیستانە ناوی مردووی تێدایە و نەتوانراوە بسڕێتەوە چونکە پێویست بووە ئەو خێزانەی کەسێکیان لێ دەمرێت ئەوا کاتێک سەردانی بنکەکانی کۆمسیۆن دەکەن ئەوا بەڵگەنامەکانی مردن لەگەڵ خۆیان ببەن و بە پێچەوانەوە ناوەکەی نەسڕاوەتەوە، ئینجا ئێمە لە ئالیەتی دیراسەکردن و وردبینیکردنین بەپێی ئەو داتایانەی لە وەزارەتی تەندروستی بەدەستمان گەیشتووە و ئێستا پارێزگاکانمان جیاکردووەتەوە و لەگەڵ وەزارەتی بازرگانی و پیشەسازی هەماهەنگیمان کردووە کە نوێترین زانیاری فۆڕمی خۆراکمان بۆ بنێرن، ئەوەش دەبێتە بنەمایەکی زۆر گرنگ بۆ ئەوەی لیستی تۆماری دەنگدەران رێکبخرێت، ماوەیەکی زۆرە کار لەسەر تۆماری دەنگدەران دەکەین، باوەڕ ناکەم کاتێکی زۆری پێویست بێت و دوای تەواوبوونیشی ئێمە رایدەگەیەنین و هەڵبژاردنەکانیش بە شێوەیەکی بێگەرد بەڕێوەدەچێت".

لەبارەی هەڵبژاردنی سەرۆکایەتی هەرێمی کوردستان کاروان جەلال گوتی: "دوای کۆبوونەوەمان لەگەڵ لایەنە پەیوەنددارەکان و دیاریکردنی وادەی هەڵبژاردنەکان، ئەوا هەڵبژاردنەکانی سەرۆکایەتی پەرلەمان و سەرۆکایەتی هەرێم بەیەکەوە ئەنجام دەدرێت".

کۆمسیۆنی باڵای سەربەخۆی ھەڵبژاردن و راپرسی، دەتوانێت لە مانگی ٤ـی ٢٠١٨ دا ھەڵبژاردن لە ھەرێمی کوردستان ئەنجامبدات و کۆمسیۆنی، لە ٨ـی شوباتەوە بۆ ماوەی ٢٥ رۆژ کار لەسەر نوێکردنەوەی تۆماری دەنگدەران دەکات و بڕیاریشە ھەفتەی داھاتوو پاککردنەوەی تۆماری دەنگدەران رابگەیەندرێت.