پشتیوانی بینالی یڵدرم لە كه‌مپینی خوێن به‌خشین

ئه‌نقه‌ره‌ - AA
سه‌رۆكوه‌زیرانی توركیا، بینالی یڵدرم به‌شداری له‌ چالاكییه‌كدا كرد كه‌ له‌لایه‌ن مانگی سووری توركیه‌وه‌ له‌ چوارچێوه‌ی كه‌مپینی خوێن به‌خشین له‌سه‌ر پردی شه‌هیدانی 15ی ته‌مووز، رێكخرابوو.
له‌ روونكردنه‌وه‌یه‌كیدا بۆ رۆژنامه‌نووسان یڵدرم خۆشحاڵی خۆی نیشان دا بۆ به‌شداری كردنی له‌ كه‌مپینه‌كه‌دا.
یڵدرم باسی له‌وه‌ كرد كه‌ هه‌ر تاكێك ئاماده‌یه‌ له‌ پێناو ئه‌م وڵاته‌دا و، گوتی: "هه‌ركاتێك پێویست بكات به‌ خوێن و گیان له‌ پێناو ئه‌م وڵات و گه‌له‌دا، هه‌ر تاكێكی ئه‌م 79 ملیۆنه‌ ئاماده‌یه‌. له‌و باره‌یه‌وه‌ هیچ دوودڵییه‌كمان نییه‌. له‌به‌رئه‌وه‌ له‌پێناو پێگه‌یاندنی نه‌وه‌یه‌كی ته‌ندروستدا، له‌پێناو ده‌سته‌به‌ركردنی پێویستی خوێن بۆ وه‌زاره‌تی ته‌ندروستیمان، خۆم زۆر به‌ خۆشحاڵ ده‌زانم كه‌ به‌ خۆم و وه‌زیرانمه‌وه‌ به‌شداری له‌و كه‌مپینه‌ واتاداره‌دا ده‌كه‌ین".
هه‌روه‌ها یڵدرم گوتی: "له‌ سه‌رده‌می ده‌سه‌ڵاتی ئاك پارتیدا مانگی سوور دووباره‌ هه‌ستاوه‌ته‌وه‌، سوپاس بۆ خوا ئه‌مڕۆ نه‌ك ته‌نیا له‌ ناو توركیادا، به‌ڵكو له‌ هه‌ر شوێنێكی جیهان هه‌ر كاره‌ساتێك رووبدات، هه‌ر دۆخێكی نائاسایی رووبدات، مانگی سووری توركی له‌وێ ئاماده‌یه‌. مانگی سووری توركی، به‌تایبه‌تی له‌ سووریا و عێراق و ئه‌و سێ ملیۆن میوانه‌ی له‌ وڵاته‌كه‌ماندا میوانداریان ده‌كه‌ین بێ گوێدانه‌ شه‌و و رۆژ به‌رده‌وامه‌ له‌سه‌ر خزمه‌ته‌كانی".
سه‌رۆكوه‌زیرانی توركیا بینالی یڵدرم گوتیشی: "سوپاس بۆ خوا گه‌لێكی وه‌هامان هه‌یه‌ كه‌ پێویستمان به‌ هیچ شتێكی دیكه‌ نییه‌. له‌ پاش بوونی گه‌لێكی له‌م شێوه‌یه‌، له‌م وڵاته‌دا له‌ وشكانیی، ده‌ریا و ئاسماندا مردن نییه‌. هیچ كه‌س ناتوانێت له‌سه‌ر ئه‌م وڵاته‌ حساب بكات. ئه‌و حسابانه‌ی كردیان له‌ناوچوو".