ئیستانبوڵ - AA

سەرکۆماری تورکیا ئەردۆغان ڕایگەیاند: "بە ئیزنی خوا، لە ٣١ی ئاداردا ئەو کێشەیە چارەسەر و ئیستانبوڵ بە سەدەی نوێی تورکیا ئاشنا دەکەینەوە".

سەرکۆماری تورکیا و سەرۆکی گشتی ئاکپارتی ڕەجەب تەیب ئەردۆغان لە میتینگێکی جەماوەری پارتەکەیدا کە لە فڕۆکەخانەی نێودەوڵەتی ئاتاتورک بەڕێوەچوو، گوتارێکی پێشکەش کرد.

سەرکۆمار ئەردۆغان ڕایگەیاند: "لە ٣١ی ئادار ئەم شارە لەدەست عەقڵییەتی جەهەپە ڕزگار دەکەین و لەگەڵ مورات کوڕوم سەردەمێکی نوێ لە ئیستانبوڵ دەست پێ دەکەین. بۆ ئەم مەبەستە ئەم هەفتەیە زۆر خۆمان ماندوو دەکەین. لەگەڵ ئەوانەی کە پێیان وایە خاوەنی ئیستانبوڵن و نە لە شارەکە و نە لە خەڵکی شارەکە تێگەیشتوون، ناگەینە هیچ شوێنێک".

گوتیشی: "نە شەرم و نە حەیا، دەڵێن میترۆمان دروست کردووە. دروستکردنی هەموو میترۆی ئیستانبوڵ هی ئێمەیە، هی ئێمە. ئیستانبوڵ لە پێنج ساڵی ڕابردوودا گەڕاوەتە بۆ سەردەمی ١٩٨٩ -١٩٩٤. هیچ کارێک و خزمەتگوزارییەک بەرچاو ناکەوێت".

سەرکۆمار ئەردۆغان ڕەخنەشی لە بەرپرسانی جەهەپە گرت و گوتی: "نیوەیان لە خلیسکانێ، نیوەیان لە پشوو و نیوەی دیکەیان لە کەمپێنەکانی خستنە خوارەوەی سەرۆکی گشتییان، ئیتر هیچ کاتێکیان بۆ نامێنێت. ئەرکی ویژدانی ئێمەیە کە بۆ شارەکە و دانیشتووانەکەی، ئیستانبوڵ لەدەست ئەوانە ڕزگار بکەین".

سەرکۆماری #تورکیا و سەرۆکی گشتی ئاکپارتی ڕەجەب تەیب #ئەردۆغان لە میتینگێکی جەماوەری پارتەکەیدا کە لە فڕۆکەخانەی نێودەوڵەتی ئاتاتورک بەڕێوەچوو، گوتارێکی پێشکەش کرد

— Anadolu Soranî (@aasorani) March 24, 2024

ڕاشیگەیاند: "سەیر بکەن، ئێستانبوڵ ئێستا لەبەردەم دووڕێیانێکدایە، لایەک دەڵێ من و لایەکی دیکەش دەڵێت، ئیستانبوڵ. بە ئیزنی خوا، لە ٣١ی ئاداردا ئەو کێشەیە چارەسەر و ئیستانبوڵ بە سەدەی نوێی تورکیا ئاشنا دەکەینەوە".

لەبارەی تۆمارەکانی پارە بژاردن کە لە تۆڕەکۆمەڵایەتییەکان بڵاو بووەتەوە، سەرکۆمار ئەردۆغان گوتی: "تا ئێستا کەس لەبارەی ئەو تۆمارە ڤیدیۆییانە لێدوانێکی مەعقوڵ و لۆژیکی نەداوە. بابەتێک کە ویژدانەکان بحەسێنێتەوە، نەمانبینی".

لە بەشێکی دیکەی قسەکانیدا سەرکۆمار ئەردۆغان ئاماژەی بە خزمەتگوزارییەکانی خۆی و پارتەکەی بە ئیستانبوڵ کرد و گوتی: "لە ٢١ ساڵی ڕابردوودا یەک ترلیۆن ٦٥٠ ملیار لیرە سەرمایەگوزاری گشتی لە ئیستانبوڵ کراوە. پابەندین بەو بنەمایانەی کە لە ساڵی ١٩٩٤ەوە ئەمانەتی ئەو شارەمان وەرگرت و لە ساڵی ٢٠٠٢شدا بەرپرسیارێتی هەموو تورکیامان لە ئەستۆ گرت. لە کەرتی تەندروستی ١٧٨ ناوەندی پزیشکیمان دروست کردووە کە بە گشتی ١٨ هەزار و ٤١٧ قەرەوێلە لە خۆ دەگرێت".

جەختیشی لەوە کردەوە کە، "خۆمان دەگەیەنینە ئەو برایانەمان کە لە هەڵبژاردنی پێشوو دەنگیان بە بەربژێرەکانی دیکە داوە و ئاستی دابەزینی شارەکەمانیان تێ دەگەیەنین".

سەرکۆمار ئەردۆغان گوتیشی: "ئیتر تاقەتی ئەوەمان نەما کە پێنج ساڵی دیکە ئیستانبوڵ لەدەست بدەین. بۆیە بە مەبەستی بەدەستهێنانی دڵ و دەنگەکەی واز لە هیچ دەنگدەرێکی ئیستانبوڵ ناهێنین".

لە کۆتاییدا سەرکۆماری تورکیا و سەرۆکی گشتی ئاکپارتی ڕەجەب تەیب ئەردۆغان بۆ بەشداربووانی متینگی ئیستانبوڵ ڕایگەیاند: "کامە لایەنی سیاسی بێت، کێشە نییە، من متمانەم بە هۆشیاری خەڵکی ئیستانبوڵ هەیە. لە ناوخی دڵمەوە باوەڕم بەوە هەیە کە ئیستانبوڵ لە ٣١ی ئاداردا شەرمەزارمان ناکات".