بەردەوامی کاریگەرییەکانی سەرماوسۆڵە لە رۆژهەڵاتی ئانادۆڵو

ئەرزەڕۆم - AA

لە پارێزگاکانی ئەرزەڕۆم، قەرس، دێرسم، ئەردەخان و ئاگری رۆژهەڵاتی ئانادۆڵو، کاریگەرییەکانی سەرماوسۆڵە بەردەوامە.

دوای ئەو بەفرەی کە شەوی رابردوو بەشێوەیەکی پچڕپچڕ لە شاری ئەرزەڕۆم باری، شەقام و ئۆتۆمبێلەکان سپیپۆش بوون.

لە شەودا پلەکانی گەرما بۆ پێنج پلەی ژێر سفری سەدی دابەزین و بەهۆی سەرماشەوە، جامی ئۆتۆمبێلەکان و بەشێکی رێگاکان بەستییان.

ئەستووری بەفر لە ناوەندی خلیسکێنەی پالاندۆکەن گەیشتە ٣٨ سانتیمەتر و لە ناوەندی خلیسکێنەی کۆناکلیش، گەیشتە ١٥ سانتیمەتر.

- قەرس

لە پارێزگای قەرس بەهۆی نزمی پلەکانی گەرماوە، رووبار و گۆماوەکان بەستییان.

بەشێک لە هاووڵاتییان بە بەتانی و فەرش ئۆتۆمبێلەکانیان داپۆشی.

لە شاری ساریقامیش، بەهۆی سەرماوە رووەک و درەختەکان زوقمیان کرد و رووکەشی زۆرێک لە رووبەرە ئاوییەکانیش بووە سەهۆڵ.

وێنەی ئەو مراوییانەش تۆمار کرا کە لە رووباری قەرس چاییدا کە بەشێکی زۆری بەستوویەتی، لەنێوان شەختە و سەهۆڵدا بەدوای خواردندا دەگەڕێن.

- دێرسم

لە پارێزگای دێرسم بەهۆی ساردی کەشوهەواوە، جامی ئۆتۆمبێلەکان بەستیان.

هەروەها رووبەرە ئاوییەکانی شارەکەش بە سەهۆڵ داپۆشران و درەختەکانیش زوقمیان گرت.

بەشێک لە هاووڵاتییان نان و گەنمیان بۆ ئەو باڵندانە دانا کە بەهۆی سەرماوە خواردنیان دەست ناکەوێت.

لە پارێزگاکانی ئەردەخان و ئاگری-یش بە هەمان شێوە سەرماوسۆڵە بووە هۆی بەستنی رێگاکان و رووکەشی رووبار و جۆگەکانیش بە سەهۆڵ داپۆشران.