ئیستانبوڵ ... مێترۆپاسێک خۆی بەسێ ئۆتۆمبێلدا کێشا

لەئاکامی رووداوێکی هاتووچۆ لەناوچه‌ی کادیکۆی ئیستانبوڵ ١٠ کەس برینداربوون.

شارەوانی ئیستانبوڵ روونکردنەوەیەکی بڵاوکردەوە و تێیدا رایگەیاند سه‌رله‌به‌یانیی ئەمڕۆ مێترۆپاسێک لەنێوان ئاجیبادەم - کادیکۆی لە رێڕەوی خۆی لایداوە و خۆی بەسێ ئۆتۆمبێلدا کێشاوە.

لە روونکردنەوەکەدا هاتووە:

''بەهۆی رووداوەکەوە ١٠ کەس برینداربوون، تەنیا شەش خولەک دوای رووداوەکەش ئۆتۆمبێلەکانی فریاکه‌وتن گەشتە شوێنەکە و بریندارەکانیان گەیاندە نەخۆشخانە''.

بەگوێرەی گوتەی شایەتحاڵان، سەرنشینێک، پەلاماری شۆفێری مێترۆپاسه‌که‌ی داوە و بەهۆیەوه‌ مێترۆپاسه‌که‌ لە رێڕەوی دیاریکراوی خۆی لایداوە و رووداوێکی هاتووچۆی لێکەوتووه‌تەوە.

لە ئێستاشدا لێکۆلینەوە لە رووداوەکە دەستیپێکردووە.