"رەزامەندی نیشاندراوە کە پارەی گەنمی جووتیاران خەرج بکرێت"

هەولێر - AA

لیژنەی کشتوکاڵ و ئاودێری لە پەرلەمانی کوردستان لەگەڵ وەزیری بازرگانیی و پیشەسازیی هەرێمی کوردستان لەبارەی پارەی گەنمی جووتیاران کۆبوویەوە و دوای کۆبوونەوەکە لە کۆنگرەیەکی رۆژنامەوانییدا ناوەڕۆکی کۆبوونەوەکە خرایەڕوو.

سەرۆکی لیژنەی کشتوکاڵ و ئاودێری لە پەرلەمانی کوردستان، عەبدولستار مەجید گوتی: "دوای سەردانی لیژنەکەمان بۆ بەغدا و بەدواداچوونمان بۆ پارەی گەنمی جووتیارانی ھەرێم کۆبوونەوەمان لەگەڵ لایەنە پەیوەندیدارەکان ئەنجامدا و لەگەڵ وەزیری بازرگانی عێراق رێککەوتین کە دەبێت دوای وەرگرتنی گەنمەکە پارەی جووتیاران بدرێت و ئەویش رەزامەندی نیشاندا کە پارەکە خەرج بکرێت".

عەبدولستار مەجید گوتیشی: "شەوی رابردوو لە پەیوەندیەکی تەلەفۆنییدا لەگەڵ سەرکۆماری عێراق و وەزیری بازرگانیی عێراق گفتوگۆمان کرد و بڕیار درا کە نیوەی مافی جووتیارانی کوردستان کە دەکاتە ٥٥٧ ملیار دینار بۆ ساڵەکانی ٢٠١٤ - ٢٠١٥- ٢٠١٦ بنێردرێت و نیوەکەی دیکەیش بکرێتە چەند بەشێک و بە شێوەی قیست بۆ جووتیارانی کوردستانی رەوانە بکەن".

لەبارەی کێشەی گوندی پەلکانەش سەرۆکی لیژنەی کشتوکاڵ و ئاودێری لە پەرلەمانی کوردستان، عەبدولستار مەجید گوتی: "داوامان لە وەزیری کشتوکاڵی عێراق کردووە کە لیژنەیەک بنێرن بۆ پەلکانە و سەرگەڕان تا چارەسەری ئەو گرفتە بکەن، چونکە ئەوەی ئێستا دەکرێت بەعەرەبکردنە و کێشەیەکی گشتی و سیاسییە".

لە کۆنگرە رۆژنامەوانییەکەدا، وەزیری بازرگانیی و پیشەسازیی ھەرێمی کوردستان، کەمال موسلیم گوتی: "ئێمە بەردەوام دەبین لە بەدەستھێنانی مافی جووتیارانی کوردستان، ھەر کاتێکیش پارەکە گەیشت ئەوا ھەر جووتیارێک نیوەی پارەکەی بۆ خەرج دەکرێت، بۆ نیوەکەی دیکەیش بەپێی قۆناغەکان پارەکە دابەش دەکرێت".