واشنتۆن ــ AA

سەرۆکی ئەمریکا، دۆناڵد ترەمپ ڕایگەیاند کە ئەگەری ھەیە ژمارەیەک ڕێککەوتننامە لە بواری بازرگانییدا لەگەڵ ھەریەک لە ژاپۆن، کۆریای باشوور و ھیندستان، واژوو بکەن.

دۆناڵد ترەمپ لە لێدوانێکدا بۆ کەناڵی "News Nation"ی ئەمریکی ئاماژەی بەوەداوە کە ئەگەری ھەیە ژمارەیەک ڕێککەوتننامە لە بواری بازرگانییدا لەگەڵ ئەو سێ وڵاتەدا واژوو بکەن و جەختی لەوەش کردەوە کە وڵاتەکەی لەم پرسەدا، ھیچ پەلە ناکات.

گوتیشی: "ئێمە ھیچ پەلەمان نییە، بەڵکو ئەوان (ژاپۆن، کۆریای باشوور و ھیندستان) پێویستییان بە ئێمەیە و ئێمە پێویستمان بەوان نییە".

دۆناڵد ترەمپ لە وڵامی پرسیارێک لەبارەی نیگەرانیی ئەمریکییەکان سەبارەت بە باج، گوتی: "خەڵکی دەتوانن تا دوو ھەفتەی دیکە چاوەڕێ بکەن".