نێچیرڤان بارزانی و مارکۆ ڕۆبیۆ لەبارەی هاريكاريىەکان لە بوارى ئابوورى و وزه گفتوگۆیان کرد
- سه‌رۆكی هەرێمی کوردستان نێچيرڤان بارزانى په‌يوه‌ندييه‌كى ته‌له‌فۆنی له وه‌زيرى ده‌ره‌وه‌ى ئه‌مريكا مارکۆ ڕۆبیۆ پێگه‌یشت.
Arbil
هەولێر - AA
سه‌رۆكى هه‌رێمى كوردستان-عێراق نێچيرڤان بارزانی، لە پەیوەندییەکی تەلەفۆنیدا لەگەڵ وەزیری دەرەوەی ئەمریکا مارکۆ ڕۆبیۆ گفتوگۆی کرد.
بە پێی ڕاگەیاندراوێکی سەرۆکایەتی هەرێم، بارزانی په‌يوه‌ندييه‌كى ته‌له‌فۆنى له مارکۆ ڕۆبیۆوه پێگه‌یشت.
لە ڕاگەیاندراوەکەدا هاتووە، "له په‌يوه‌ندييه‌كه‌دا هه‌ردوولا جەختیان له بره‌ودان به پەیوەنديی ستراتیژيی ئەمریکا و هەرێمی کوردستان کردەوە، هەروەها باسيان له هاريكاريى بوارى ئابوورى و وزه و گرنگيی بەردەوامبوونی هەماهەنگی نێوانيان کرد بۆ پشتگيری سەقامگیری و ئارامى لە عێراق، سووریا و ناوچەکە به‌گشتی".
سەرۆکایەتی هەرێم ڕاشیگەیاندووە کە وەزیری دەرەوەی ئەمریکا وێڕای دەربڕینی سوپاسی خۆی بۆ نێچيرڤان بارزانی لە ڕۆڵ و هەوڵەکانی لە چارەسەرکردنی کێشەكانى نێوان بەغدا و هەولێر، ڕایگەیاندووە کە "پشتگيريی ئەمریکا بۆ هەرێمی کوردستان، به بنەمایەکی سەرەکيی پەیوەنديی ستراتيژيى ئەمریکا لەگەڵ عێراقدا دەمێنێتەوە".
