Turqia dënon “grushtin e shtetit” në Tunizi

STAMBOLL (AA) – Disa zyrtarë të lartë turq kanë dënuar veprimet e presidentit të Tunizisë për marrjen e pushtetit të plotë ekzekutiv pasi shkarkoi kryeministrin dhe pezulloi parlamentin, transmeton Anadolu Agency (AA).

Presidenti tunizian Kais Saied shkarkoi qeverinë e kryeministrit Hichem Mechichi të dielën vonë, ngriu parlamentin dhe mori autoritetin ekzekutiv me ndihmën e një kryeministri të ri.

Në fjalën e tij, Saied tha se ai do të heqë imunitetin e të gjithë anëtarëve të parlamentit dhe do të marrë rolin e prokurorit publik. Ai tha se e ka marrë këtë vendim pasi është konsultuar me Mechichi-n dhe kryetarin e parlamentit Rached Ghannouchi.

"Ajo që po ndodh në Tunizi është shqetësuese. Vendimet që ndalojnë parlamentin e zgjedhur dhe deputetët të përmbushin detyrat e tyre janë një grusht shteti kundër rendit kushtetues", tha kryetari i parlamentit të Turqisë Mustafa Şentop në Twitter.

"Grushti i shtetit ushtarak/burokratik është i paligjshëm në Tunizi ashtu si është kudo. Populli i Tunizisë do të mbajë rendin kushtetues dhe ligjin", shtoi Şentop.

Zëdhënësi presidencial i Turqisë gjithashtu kundërshtoi "pezullimin e procesit demokratik dhe injorimin e vullnetit demokratik të njerëzve në Tunizi".

"Ne dënojmë iniciativat që nuk kanë legjitimitet kushtetues dhe mbështetje publike. Ne besojmë se demokracia tuniziane do të dalë më e fortë nga ky proces", tha Ibrahim Kalın në Twitter.

Ömer Çelik, zëdhënës i Partisë së Drejtësisë dhe Zhvillimit (AK) të Turqisë, përshkroi zhvillimet aktuale në Tunizi si një "grusht shteti" që synon legjitimitetin politik në vend.

Çelik shtoi se "Turqia qëndron pranë popullit tunizian dhe respekton luftën për demokraci", duke nënvizuar mbështetjen e presidentit turk Recep Tayyip Erdoğan për demokracinë në vend.

Duke theksuar se Turqia është kundër të gjitha grushteve të shtetit, Numan Kurtulmuş, nënkryetari i partisë, tha: "Ne shohim që grushti i shtetit në Tunizi do të dëmtojë popullin tunizian. Si Turqi, ne jemi kundër këtij veprimi antidemokratik deri në fund”.

Tunizia është përballur me protesta popullore si ndaj qeverisë ashtu edhe kundër opozitës, me sulme të raportuara në selitë dhe ndërtesat e partisë së moderuar islame Ennahda të Ghannouchi-t në disa provinca tuniziane.

Që nga janari, vendi ka qenë në një bllokim politik mes një mosmarrëveshjeje midis Saied-it dhe Mechichi-t rreth një riorganizimi qeveritar që Saied e refuzoi.

Vendi po ashtu përballet me një krizë ekonomike dhe rritje të infeksioneve të koronavirusit, ndërsa janë bërë paralajmërime për një kolaps të mundshëm të sistemit shëndetësor.