Turqia dënon fuqishëm sulmet e Izraelit ndaj Libanit

Turqia “dënoi fuqishëm” sulmet e Izraelit në Liban, të cilat kanë shkaktuar zhvendosjen e rreth 1 milion njerëzve, transmeton Anadolu

Në një deklaratë në faqen e Ministrisë së Jashtme turke, Ankaraja tha se këto sulme “përbëjnë shkelje të rëndë të së drejtës ndërkombëtare humanitare”.

“Është e qartë se Izraeli ekspansionist synon të thellojë më tej paqëndrueshmërinë rajonale. Qeverisë së Netanyahut nuk duhet t’i lejohet të vazhdojë praktikat e saj shkatërruese në Liban, ashtu siç ka vepruar në Gaza”, thuhet në deklaratë.

Turqia do të vazhdojë të “qëndrojë në solidaritet” me popullin dhe shtetin libanez përballë “sulmeve të Izraelit që kërcënojnë integritetin territorial dhe sovranitetin e Libanit”, shtoi ministria.

Më 2 mars, grupi libanez Hezbollah filloi të sulmojë objektivat ushtarake izraelite si përgjigje ndaj sulmeve të përsëritura izraelite në Liban dhe vrasjes së liderit suprem iranian Ali Khamenei në një sulm të përbashkët SHBA-Izrael.

Izraeli reagoi duke nisur një fushatë ushtarake në Liban, duke kryer sulme ajrore në periferi të Bejrutit në jug dhe në zona të tjera në jug dhe lindje të vendit, ndërsa më 3 mars nisi një pushtim të kufizuar tokësor në jug të Libanit.

Sipas ministrit të Shëndetësisë të Libanit, Rakan Nasser El Din, sulmet kanë shkaktuar 634 vdekje, përfshirë 91 fëmijë, si dhe 1.586 të lënduar.