Istanbuli do të jetë nikoqir i finales së Ligës së Evropës 2026

Anëtari i Bordit Ekzekutiv të UEFA-s, Servet Yardımcı tha se qyteti i Istanbulit do të jetë nikoqir i finaleve të Ligës së Evropës 2026 dhe Ligës së Konferencës 2027, raporton Anadolu.

Mbledhja e Bordit Ekzekutiv të UEFA-s, ku mori pjesë Yardımcı, u mbajt në kryeqytetin e Irlandës, Dublin.

Bordi vendosi që finalja e Ligës së Evropës 2026 të mbahet në stadiumin "Tüpraş" në Istanbul, ku ndeshjet si nikoqir i zhvillon klubi i Beşiktaşit.

Stadiumi ku do të zhvillohet finalja e Ligës së Konferencës 2027 do të përcaktohet më vonë.

Stadiumi "Tüpraş", i njohur më parë si "Vodafone Park", ishte nikoqir i finales së Superkupës së UEFA-s 2019 midis Liverpoolit dhe Chelseat.