E vendosur në bregun e oqeanit në Dakar, kryeqytetin e Senegalit, Xhamia Hyjnore (Mosque de la Divinite), e ndërtuar mbi ëndrrën e një dijetari fetar, konsiderohet si një nga monumentet më të rëndësishme të qytetit.
Xhamia Hyjnore ndodhet në Ouakam, Dakar, pranë një fshati peshkatarësh në bregdetin e Atlantikut, përgjatë rrugës bregdetare.
Vendndodhja e saj buzë oqeanit dhe varkat shumëngjyrëshe të peshkimit që shtrihen përgjatë fasadës e bëjnë xhaminë një nga elementët më të paharrueshëm të qytetit.
E projektuar nga arkitekti i njohur senegalez, Cheick Ngom, silueta e bardhë e xhamisë përzihet në mënyrë të përsosur me oqeanin dhe plotësohet nga dy minare këndore, 45 metra të larta.
Procesi i ndërtimit të xhamisë shquhet si elementi më domethënës që e dallon atë nga vendet e tjera të adhurimit në qytet.
Historia e xhamisë, e njohur në vend edhe si "Xhamia Rabbani", daton nga një ëndërr e Muhammad Seyni Gueye, një dijetar fetar që jetonte në Ouakam.
Djali i Gueyes, Muhammad Nebi Gueye, tregoi për Anadolu historinë e Xhamisë Hyjnore.
- Xhamia që "zbret nga qielli"
Gueye shpjegoi se babai i tij vendosi ta ndërtonte xhaminë pas një ëndrre.
"Babai im pa një ëndërr më 28 qershor 1973. Në ëndrrën e tij, një model i ndritshëm i xhamisë u shfaq në mes të oqeanit dhe modeli zbriti në zonën shkëmbore ku ndodhet xhamia sot. Babai im vrapoi për të parë xhaminë të zbriste nga qielli dhe u prek thellë nga kjo ëndërr", tha ai.
Gueye theksoi se babai i tij vizatoi detajet e xhamisë që pa në ëndërr sapo u zgjua. Ai shtoi se ndërtimi filloi në vitin 1992.
Ai tha se ndërtimi përfundoi pesë vjet e pesë muaj më vonë, në vitin 1997, dhe se dyert e xhamisë nuk janë mbyllur kurrë që atëherë.
- Namazi i xhumasë falet me të bardha
Gueye theksoi se namazi i xhumasë falet me të bardha në xhami, ndryshe nga vendet e tjera të adhurimit. "Babait tim iu këshillua në ëndërr të falte namazin e xhumasë me të bardha. Prandaj, ata që dëshirojnë ta falin xhumanë brenda xhamisë duhet të veshin një rrobë të bardhë. Ne ua japim hua atyre që nuk kanë një të tillë në hyrje të xhamisë".
Gueye ftoi të gjithë muslimanët që ndodhen në Dakar të vizitojnë xhaminë dhe të falin xhumanë së bashku.
Abdoulaye Diagne, një anëtar i xhamisë, tha se ai fal namazin e xhumasë në Xhaminë Hyjnore dhe se atmosfera shpirtërore atje është unike.
"Edhe pse jetoj larg, më pëlqen të vij këtu çdo të premte i veshur me rrobën time të bardhë. Më pëlqen t'i shoh xhematin të veshur me të bardha. Gjithmonë përpiqem t'i sjell miqtë e mi që vizitojnë Dakarin në namazin e xhumasë. Kjo është një xhami shumë e veçantë, edhe nga ana historike edhe nga arkitektura e saj", tha Diagne.
