Bakir Izetbegoviç rezulton pozitiv në COVID-19

Bakir Izetbegoviç, kryetari i Partisë së Veprimit Demokratik (SDA) në Bosnjë dhe Hercegovinë dhe zëvendëskryetar i Asamblesë së Popujve, ka rezultuar pozitiv në testin për koronavirusin e ri (COVID-19), transmeton Anadolu Agency (AA).

Në një deklaratë nga partia e tij thuhet se rezultati i testit të liderit boshnjak ka rezultuar pozitiv dhe se ai është në gjendje të mirë shëndetësore.

Izetbegoviç ka anuluar të gjitha programet e planifikuara dhe po qëndron në izolim në shtëpinë e tij.

Në Bosnjë dhe Hercegovinë janë regjistruar 621 raste të reja në 24 orët e fundit, që është rritja më e lartë ditore që nga fillimi i pandemisë. Gjithsej 32.845 njerëz janë diagnostikuar me COVID-19 deri më tani, ndërsa 980 persona kanë humbur jetën.