Mustafa Üstünel, 54-vjeç, i cili përgatit tespihe (rruaza të lutjes) nga kokrrat e dëllinjave në rrethin Kadirli të provincës turke Osmaniye, e ushtron profesionin e tij për 35 vjet.
Mjeshtri Üstünel, i cili filloi të bënte tespihe si praktikant në moshën 19-vjeçare, shkon në pyjet e larta ku rriten dëllinjat për të prodhuar tespihet unike.
Duke analizuar degët e pemëve me kolegët e tij, Üstünel i çon kokrrat e dëllinjave që mbledh në shtëpinë e tij, të cilën e përdor edhe si punishte.
Pas tharjes, Üstünel i ndan kokrrat nga lëvozhgat e tyre me një makinë qëruese dhe u jep formë me një makinë.
Üstünel, i cili bën tespihe me 33 rruaza në ngjyra të ndryshme duke përdorur kokrrat, i shet produktet e tij përmes internetit.
Rruazat e lutjes nga kokrrat e dëllinjës, të cilat dallohen për aromën, natyralitetin dhe lehtësinë e përdorimit të tyre, janë të kërkuara në gjithë vendin.
Mustafa Üstünel, i cili është i martuar dhe ka tre fëmijë, për Anadolu tha se nuk e ka lënë profesionin e tij për 35 vjet.
Mjeshtri Mustafa deklaron se prodhimi i tespiheve është i vështirë, duke shtuar se kalon orë të tëra midis dëllinjave për të gjetur kokrrat më të mira.
Ai thotë se bën nga pesë tespihe në ditë. "Interesi i njerëzve për tespihet nga dëllinja është shumë i lartë. Kërkohet shumë sepse është bërë nga materiale natyrore", tha ai.
Üstünel shtoi se ka vështirësi në gjetjen e praktikantëve dhe ndihmësve që do ta vazhdojnë profesionin në të ardhmen.
