Java e Tregtisë Elektronike (E-Commerce) e Turqisë ka nisur sot në Stamboll, duke mbledhur së bashku aktorë nga i gjithë sektori nën temën "Tregtia e së ardhmes".

Ngjarja dyditore organizohet nga Ministria e Tregtisë, Shoqata e Operatorëve të Tregtisë Elektronike (ETID) dhe Unioni i Dhomave dhe Shkëmbimeve të Mallrave (TOBB).

Agjencia Anadolu shërben si partner global i komunikimit i aktivitetit.

Programi përfshin panele, masterklasa, punëtori, ekspozita, zona përvojash, takime mes startupeve dhe bizneseve, si dhe sesione rrjetëzimi, me synimin për të formësuar vizionin e Turqisë për tregtinë digjitale duke lidhur profesionistë të industrisë, investitorë, akademikë, zyrtarë publikë dhe konsumatorë.

Gjatë eventit do të theksohen historitë e suksesit nga Turqia dhe jashtë saj, arritjet sipërmarrëse, mundësitë e krijuara nga inteligjenca artificiale dhe ndikimet e transformimit digjital.

Ministri turk i Tregtisë, Omer Bolat, në ceremoninë e hapjes deklaroi se aktiviteti po pret 17 mijë pjesëmarrës dhe pritet të jetë një sukses i madh për sektorin.

Bolat vuri në dukje rritjen e shpejtë të tregtisë elektronike, e cila u përshpejtua ndjeshëm nga pandemia. "Deri atëherë, pjesa e tregtisë elektronike në tregtinë globale dhe në atë turke ishte rreth 4,5-5 për qind, por brenda dy ose tri vitesh u rrit në 21 për qind. Aktualisht, një në çdo pesë transaksione kryhet në internet", tha ai.

Ministri theksoi gjithashtu rëndësinë e rregullimeve që sigurojnë konkurrencë të drejtë mes platformave dhe krijimin e një strukture tregu me më shumë aktorë. Ai shtoi se masat për mbrojtjen e konsumatorëve - përfshirë transparencën e kushteve të përdorimit, të drejtën e tërheqjes, proceset e kthimit dhe detyrimet e shitësve - janë bërë të qarta dhe të detajuara.