Me afrimin e Ramazanit, një ëmbëlsirë e bërë nga kungulli dhe unike për qytetin Saida (Sidon) në Libanin jugor, xhezerije, ka zënë vendin e saj në kulturën e popullit, raporton Anadolu.

Saida, i cili e mban gjallë traditën e xhezerijes, të transmetuar brez pas brezi, vazhdon përgatitjet për Ramazanin me këtë ëmbëlsirë unike. E bërë nga kungulli, xhezerija merr emrin nga pamja e saj, e cila i ngjan ngjyrës së një karote.

Një delikatesë unike për Saidan, xhezerija është ndër simbolet e qytetit. E shfaqur në tezgat në rrugë dhe pazaret e vjetra rreth gjysmës së dytë të muajit Shaban, që përkon me Natën e Beratit, ëmbëlsira tërheq interes të madh me aromën e saj dalluese dhe pamjen mbresëlënëse.

Për banorët e qytetit, kjo embëlsirë konsiderohet si një nga elementët e rëndësishëm të trashëgimisë kulturore të qytetit. Përveç konsumimit të kësaj ëmbëlsire në shtëpi, banorët e qytetit ua ofrojnë atë mysafirëve të tyre dhe e mbajnë gjallë këtë traditë duke ua dhuruar të afërmve dhe miqve, duke e transmetuar atë brez pas brezi.

Omer dhe Halid Arnaut, vëllezër që e trashëguan këtë profesion nga babai i tyre, i njohur në qytet si "i dhembshuri", sjellin xhezerijen në tavolinat e qytetarëve.

Vëllezërit Arnaut shpjeguan për Anadolu përgatitjen e kësaj ëmbëlsire, e konsideruar si një paralajmërues i Ramazanit, dhe traditën e vazhdueshme.

"Ne duam t'ua kalojmë këtë profesion fëmijëve tanë"

Mjeshtri Omer Arnaut deklaroi se përgatitja e xhezerijes përfshin shumë faza delikate që kërkojnë përvojë dhe punë intensive, duke thënë: "Ne e trashëguam këtë profesion nga baballarët tanë dhe duam t'ua kalojmë fëmijëve tanë".

Duke shpjeguar se çdo fazë ka kohëzgjatjen e vet, Arnaut tha: "Qërimi i kungullit, pastrimi i pjesës së brendshme, grirja dhe larja zgjat rreth 2 orë. Pastaj kullohet përsëri dhe gatuhet në zjarr për 2 orë. Kështu, arrin formën përfundimtare, gati për shitje."

Arnaut deklaroi se ata i shesin produktet e tyre në dy dyqane në qytet dhe se kërkesa për xhezerijen është e lartë.

"Xhezerija është një traditë shoqërore dhe fetare e rrënjosur thellë"

Halid Arnaut tha se megjithëse jeton në Arabinë Saudite, ai vjen në Liban çdo vit gjatë sezonit të xhezerijes për të marrë pjesë në përgatitjet me familjen e tij dhe për të mbështetur punën para Ramazanit.

Halid Arnaut tha: "Xhezerija është një traditë shoqërore dhe fetare e rrënjosur thellë. Kërkesa për ëmbëlsirën zakonisht arrin kulmin midis ditës së 12-të dhe të 17-të të muajit Shaban".

Ai deklaroi se ata kujdesen për të ruajtur dhe zhvilluar këtë profesion, i cili kryhet brenda familjes, dhe se xhezerija është "një trashëgimi unike për Saida-n, e transmetuar brez pas brezi".

Arnaut vuri në dukje se për shkak të krizës ekonomike që ka vazhduar në Liban për rreth 6 vjet, çmimi i saj është rritur gjithashtu, duke shtuar se çmimi për kilogram të ëmbëlsirës ka arritur në 900.000 paund libanezë (afërsisht 10 dollarë).