Vazhdojnë protestat kundër Netanyahut në Izrael

Vazhduan edhe në javën e 26-të protestat në Izrael për dorëheqjen e kryeministrit Benjamin Netanyahu me arsyen se ka keqmenaxhuar situatën e koronavirusit të ri (COVID-19) dhe për shkak të gjykimit të tij për korrupsion, transmeton Anadolu Agency (AA).

Hapësira përpara ndërtesës së kryeministrisë në Kudsin Perëndimor ka qenë adresa më e rëndësishme e protestave që u organizuan nga grupet që kërkojnë dorëheqjen e Netanyahut.

Disa protestues të veshur me bluza me mbishkrimin "kryeministri i krimit", duke goditur me lugë tiganët dhe tenxheret që kishin marrë me vete u përpoqën të tërheqin vëmendjen mbi vështirësitë financiare që po përjetojnë për shkak të COVID-19.

Në protestën ku morën pjesë më shumë se një mijë persona u hodh slogani "Bibi (Netanyahu) ik në shtëpi".

Ndërkohë policia bllokoi trafikun në rrugët që shkonin drejt sheshit ku u mbajtën protestat.

Protestë përpara qendrës shëndetësore ku u vaksinua Netanyahu

Protesta të ngjashme u mbajtën edhe në sheshin Rabin në Tel Aviv dhe përpara qendrës shëndetësore në qytetin Ramat Gan ku Netanyahu u vaksinua në transmetim të drejtpërdrejt.

Prej më shumë se 6 muajsh në Izrael mbahen protesta për dorëheqjen e Nentanyahut për shkak të gjykimit të tij për korrupsion dhe se ka keqmenaxhuar krizën e COVID-19.