Ushtarët izraelitë arrestojnë 22 palestinezë në Bregun Perëndimor

Ushtria izraelite arrestoi 22 palestinezë gjatë bastisjeve që kreu natën në Bregun Perëndimor nën pushtim, transmeton Anadolu.

Në një deklaratë të përbashkët nga Shoqata e të Burgosurve Palestinezë dhe Delegacioni për të Burgosurit dhe të Liruarit të lidhur me Organizatën për Çlirimin e Palestinës thuhet se forcat izraelite kanë vazhduar bastisjet dhe arrestimet e tyre kundër palestinezëve në Bregun Perëndimor.

Me arrestimet e fundit ka arritur në 8.610 numri i palestinezëve të arrestuar që nga 7 tetori 2023 e deri më tani nga ushtria izraelite në Bregun Perëndimor.

Po ashtu në deklaratë informohet se në mesin e të arrestuarve ndodhet një vajzë e re, një fëmijë 8-vjeç dhe ish të burgosur të liruar më parë.

Që nga 7 tetori 2023, kur ushtria izraelite filloi sulmet në Rripin e Gazës, ka patur rritje të arrestimeve, bastisjeve dhe sulmeve kundër palestinezëve në Bregun Perëndimor të pushtuar dhe Kudsin Lindor.

Në sulmet e ushtarëve izraelitë dhe kolonëve të paligjshëm hebrenj që nga 7 tetori e deri më tani, në Bregun Perëndimor dhe Kudsin Lindor nën pushtim janë vrarë 497 palestinezë.