SHBA-ja urdhëron kompanitë që punonjësit e tyre të vaksinohen plotësisht deri më 4 janar

Administrata e presidentit amerikan Joe Biden urdhëroi kompanitë amerikane që të sigurohen që deri më 4 janar, punonjësit të vaksinohen plotësisht ose të testohen rregullisht për koronavirusin (COVID-19), transmeton Anadolu Agency (AA).

Rregullorja e re zbatohet për bizneset që kanë 100 ose më shumë punonjës, sipas Administratës së Sigurisë dhe Shëndetit në Punë (OSHA) pranë Departamentit të Punës.

Punonjësit që nuk kanë vaksinë, kërkohet të mbajnë maska ​​duke filluar nga 5 dhjetori dhe të ofrojnë test javor negativ për COVID-19 pas afatit të 4 janarit.

Kompanitë mund të ofrojnë lirim me pagesë nga puna për punonjësit që të vaksinohen deri më 5 dhjetor dhe të paguajnë pushim mjekësor për punëtorët për t'u rikuperuar nga çdo efekt anësor i mundshëm.

Punonjësit që rezultojnë pozitivë do të ndalohen të shkojnë në punë.

Ndërsa afati për kërkesa të ngjashme për kontraktorët federalë është zgjatur deri më 4 janar, rregullat e tyre nuk përfshijnë një opsion testimi të rregullt për COVID-19.

Rregulloret e reja lejojnë kontraktorët të përcaktojnë se si do të zbatojnë kërkesat shëndetësore për punëtorët që refuzojnë të vaksinohen.

OSHA tha se do të kryejë inspektime në kantiere për t’u siguruar që kompanitë respektojnë rregullat.

Rregulloret e reja përfshijnë 84 milionë punëtorë në sektorin privat të SHBA-së.