"Presidenti i Gabonit, Ali Bongo po mbahet nën arrest shtëpiak"

Në Gabon ku një grup ushtarak njoftoi marrjen e qeverisë tha se presidenti Ali Bongo po mbahet nën arrest shtëpiak, transmeton Anadolu.

Në një deklaratë nga administrata ushtarake që ka emërtuar veten si Komiteti i Tranzicionit dhe Restaurimit të Institucioneve (CRTI) thuhet se presidenti Bongo po mbahet nën arrest shtëpiak.

Më tej në deklaratë theksohet se edhe një nga djemtë e presidentit Bongo është arrestuar me akuzën për "tradhti ndaj atdheut".

Ushtarakët marrin qeverinë

Një grup ushtarakësh në vendin e Afrikës Qendrore në Gabon hynë në orët e para të mëngjesit në ndërtesën e televizionit kombëtar dhe njoftuan marrjen e qeverisë.

Ushtarakët në deklaratë njoftuan anulimin e zgjedhjeve presidenciale të mbajtura më 26 gusht dhe mbylljen e kufijve të vendit.

Presidenti aktual Ali Bongo Ondimba fitoi për herë të tretë në zgjedhjet presidenciale që u mbajtën më 26 gusht. Ali Bongo, 64-vjeç, mori detyrën në vitin 2009 nga babai i tij Omar Bongo i cili drejtoi vendin për një periudhë për më shumë se 41 vjet.

Në vend u vendos ndalesë e daljes në rrugë me arsyen se në orët e fundit të procesit të votimit u zbatua "dhunë" ndërsa u kufizua interneti teksa vazhdonte procesi i numërimit pas zgjedhjeve.

Opozitarët reaguan ndaj praktikave të qeverisë dhe lideri opozitar Ondo Ossa pretendoi se zgjedhjet u manipuluan në garën presidenciale që ai zhvilloi kundër Ali Bongo-s.