Papa Françesku arrin në vizitë zyrtare në Bullgari

Kreu i Kishës Katolike Papa Françesku arriti për vizitë dyditore zyrtare në Bullgari, raporton Anadolu Agency (AA).

Papa Françesku në aeroportin e Sofjes u prit nga kryeministri i Bullgarisë, Bojko Borisov dhe një numër zyrtarësh të lartë bullgarë.

Borisov ndër të tjera Papën në aeroport e gostiti me një gotë jogurti bullgar.

Kryeministri bullgar sqaroi veprimin e tij se kishte dëgjuar se Papa Françesku për herë të parë kishte dëgjuar për Bullgarinë në fëmijërinë e tij të hershme kur gjyshja e tij në Argjentinë i kishte dhënë një gotë jogurti bullgar.

"Kam kënaqësinë të pres njeriun që është simbol i fesë në botë", ka thënë Borisov në aeroport.

Gjatë vizitës dyditore Papa do të takohet me kryeministrin Borisov dhe do të vizitojë kampet e refugjatëve në Bullgari.

Autoritetet bullgare zbatojnë poltika të ashpra të parandalimit të hyrjes së emigrantëve, e cila nuk përputhet me qëndrimin e Papës i cili shpesh bënë thirrje që të ndihmohen njerëzit në fatkeqësi.

Vizita e Papës në Bullgari u organizua tre javë para zgjedhjeve parlamentare evropiane. Bullgaria është anëtare e Bashkimit Evropian që nga viti 2007 dhe me paga mesatare mujore prej 575 euro është vendi më i pazhvilluar në BE.

Pas përfunditmit të vizitës në Bullgari, Papa do të udhëtojë për vizitë njëditore në Maqedoninë e Veriut.