Pamje të Qabesë në Mekë nga Kulla e Sahatit 601 metra lartësi

Përfaqësuesit e mediave të huaja që ndodhen në Mekë për të ndjekur udhëtimin e shenjtë të haxhinjve bënë fotografi të Qabes dhe rrethinës së saj nga Kulla Mbretërore e Sahatit me lartësi 601 metra, raporton Anadolu.

Muslimanët nga vende të ndryshme të botës që kanë ardhur në tokat e shenjta në qytetin e Mekës të Arabisë Saudite, vazhdojnë adhurimin e tyre për të përmbushur detyrimin e Haxhit.

Gazetarët e huaj që ndodhen në Mekë për të ndjekur detyrat e shenjta të haxhinjve, me organizimin e përfaqësuesve të mediave të Arabisë Saudite, u ngjitën në Kullën Mbretërore të Sahatit me lartësi 601 metra. Qabja dhe rrethina e saj u filmuan nga këtu.

Farhah Ruslan, një gazetare e Agjencisë malajziane të lajmeve Bernama, tha: "Mashallah Subhanallah. Pamja është e mrekullueshme. Pamja e Qabes nga 601 metra mbi tokë është e bukur. Është e mahnitshme të përjetosh të gjitha këto me ftesën e mediave saudite".

Ndërsa udhërrëfyesi Ali Tarak tha: "Nga ballkoni i orës më të madhe në botë, mund ta shihni Qaben nga një pamje e lartë. Kjo nuk është diçka që të gjithë kanë mundësinë ta përjetojnë. Përjetoni emocione të ndryshme. Ju jep një perspektivë të ndryshme. Kjo është qendra e botës, Qabeja të qetëson shpirtin".

- Kulla Mbretërore e Sahatit

Kulla Mbretërore e Sahatit, e cila u hap në Mekë të Arabisë Saudite në vitin 2011, është ndërtesa e tretë më e lartë në botë. E ndërtuar menjëherë pranë Qabes, struktura përbëhet nga 120 kate. Ora në strukturë, e cila thuhet të jetë kulla më e madhe e sahatit, mund të lexohet nga kilometra larg ditë e natë. Ndërtesa, e cila është 601 metra e lartë, strehon një hotel me 5 yje, një qendër tregtare dhe një muze.