Në sulmin e Izraelit në jug të Libanit humbin jetën 3 persona

Sipas raporteve fillestare, 3 persona kanë humbur jetën dhe 7 të tjerë janë plagosur në sulmin ajror të kryer nga ushtria izraelite në jug të kryeqytetit të Libanit, Bejrut, transmeton Anadolu.

Sipas lajmit të agjencisë zyrtare libaneze të lajmeve NNA, avionët luftarakë izraelitë kanë shënjestruar me dy raketa një ndërtesë në jug të Bejrutit.

Në një deklaratë me shkrim nga Ministria e Shëndetësisë së Libanit thuhet se nga sulmi ajror, sipas raportimeve fillestare, 3 persona kanë humbur jetën dhe 7 të tjerë janë plagosur.

Zëdhënësi i ushtrisë izraelite, Avichay Adraee në një deklaratë në llogarinë e tij në X tha se kanë bombarduar me avionë luftarakë jugun e Bejrutit.

Duke mbrojtur idenë se me sulmin në fjalë u shënjestrua një element i Hezbollahut, Andrae pretendon se elementi i shënjestruar i Hezbollahut kohët e fundit kishte ndihmuar anëtarët e Hamasit me synimin për të ndërmarrë veprime kundër Izraelit.

Ushtria izraelite njoftoi se më 28 mars në pjesën veriore të vendit u hodhën raketa nga Libani jugor dhe më pas ajo shënjestroi Libanin jugor dhe Bejrutin me një seri sulmesh ajrore.

Ky sulm nga avionët luftarakë izraelitë ishte bombardimi i parë në Bejrut pas armëpushimit që hyri në fuqi më 27 nëntor 2024.

- Armëpushimi dhe shkeljet e Izraelit me Libanin

Në Komitetin e Mbikëqyrjes së Armëpushimit, i krijuar sipas marrëveshjes së armëpushimit midis Libanit dhe Izraelit, krahas Forcës së Përkohshme të Paqes të OKB-së në Liban (UNIFIL), Libanit dhe Izraelit janë të përfshira edhe Franca dhe SHBA-ja.

Pavarësisht marrëveshjes së armëpushimit midis Izraelit dhe Libanit më 27 nëntor 2024, Izraeli e shkel shpesh marrëveshjen. Sipas të dhënave të autoriteteve libaneze, qindra njerëz u vranë dhe u plagosën në sulmet e kryera nga ushtria izraelite pas armëpushimit.

Ushtria izraelite e cila hyri në qytetet në kufi gjatë sulmeve tokësore në Liban, pavarësisht nenit për tërheqje në marrëveshjen e armëpushimit ajo vazhdon praninë e saj në 5 pika përfshirë kodrat Hamamis, Al-Aziyya, Uveyda, Lebbune dhe malin Balat.