NATO dënon sulmet e regjimit të Asadit në Idlib

Sekretari i Përgjithshëm i NATO-s, Jens Stoltenberg ka dënuar sot sulmet vdekjeprurëse nga regjimi i Asadit në Idlib, një zonë e Sirisë veriperëndimore që supozohej të ishte nën armëpushim, raporton Anadolu Agency (AA).

"Kemi parë granatime pa dallim të objektivave civile. Dënojmë sulme pa dallim kundër civilëve", tha kreu i NATO-s, Stoltenberg para takimit të ministrave të Mbrojtjes të NATO-s që fillon të mërkurën.

"Jam shumë i shqetësuar për situatën në Idlib sepse kemi parë sulme të tmerrshme kundër civilëve. Ne kemi parë përsëri se qindra mijëra njerëz janë detyruar të ikin", shtoi ai.

Stoltenberg gjithashtu u bëri thirrje regjimit të Asadit dhe Rusisë që të ndalojnë sulmet në Idlib dhe se çështja pritet të ngrihet në mbledhjen e ministrave të Mbrojtjes.

"Ne i bëjmë thirrje Asadit dhe Rusisë, sepse Rusia i jep mbështetje regjimit, për të ndaluar këto sulme, për të respektuar ligjin ndërkombëtar dhe për të mbështetur plotësisht përpjekjet e OKB-së në tentimin për të gjetur një zgjidhje paqësore", tha ai.

Idlibi ka qenë bastion i opozitës dhe grupeve të armatosura antiqeveritare që nga shpërthimi i luftës civile siriane në vitin 2011.

Në shtator të vitit 2018, në Soçi, Rusia, Turqia dhe Irani ranë dakord për ta kthyer Idlibin në një zonë de-eskalimi në të cilën aktet e agresionit janë të ndaluara.

Por, më shumë se 1.800 civilë janë vrarë gjatë sulmeve të regjimit dhe forcave ruse që nga ajo kohë, duke shkelur si armëpushimin e vitit 2018 ashtu edhe një të ri që filloi më 12 janar.

Thirrja e Stoltenbergut bëri jehonë shqetësimet e ngritura nga presidenti turk Recep Tayyip Erdoğan, i cili ka dënuar sulmet e Asadit mbi civilët Idlib dhe trupave turke të stacionuara atje nën një pakt të deeskalimit me Rusinë.

Erdoğan gjithashtu i ka kërkuar Rusisë, aleatit të Asadit, t’u përmbahen proceseve të paqes në Astana dhe Soçi për Sirinë dhe të bëjë më shumë për t'i ndalur sulmet.

Të hënën, pesë ushtarë turq ranë dëshmorë dhe pesë të tjerë u plagosën në granatimet e forcave të regjimit në Idlib. Gjithashtu shtatë ushtarë turq dhe një kontraktues civil që punonin me ushtrinë turke u martirizuan në një sulm të ngjashëm javën e kaluar.

Ushtarët turq janë në Idlib, fillimisht një zonë armëpushimi, nën një marrëveshje midis Turqisë dhe Rusisë, si pjesë e misionit anti-terrorist dhe paqes.