Tuğba Altun
21 janar 2025•Përditësim: 22 janar 2025
Türkiye dhe Sllovakia po avancojnë bashkëpunimin e tyre ekonomik dhe po eksplorojnë mundësitë e projekteve nga të cilat do të përfitojnë të dyja vendet, tha zëvendëskryeministrja e Sllovakisë, njëherësh ministre e Ekonomisë, Denisa Sakova, raporton Anadolu.
Duke folur në një takim me biznesmenë në tryezën e rrumbullakët Türkiye-Sllovaki, në të cilën mori pjesë ministri turk të Tregtisë Omer Bolat, Sakova të hënën theksoi se takimi kishte një qëllim të veçantë: nxitjen dhe thellimin e lidhjeve midis kompanive në Türkiye dhe Sllovaki.
Sakova theksoi se Türkiye është ndër dhjetë partnerët kryesorë të biznesit të Sllovakisë, duke vënë në dukje se disa firma sllovake kanë filluar tashmë operimet në Türkiye. Ajo shprehu kënaqësi me Komitetin e Përbashkët Ekonomik dhe Tregtar të vendeve, një platformë që forcon bashkëpunimin dypalësh.
“Jemi sot këtu për të thelluar bashkëpunimin dhe për të krijuar një kornizë për zhvillimin e marrëdhënieve më intensive ekonomike”, tha ajo, duke shtuar se përfaqësues nga industri të ndryshme sllovake morën pjesë në takim për të diskutuar lidhjet e drejtpërdrejta midis dy vendeve.
Ajo nënvizoi synimin e Sllovakisë për të bashkëpunuar me Türkiyen në sektorin e energjisë, duke vënë në dukje se Türkiye planifikon të investojë 170 miliardë euro deri në vitin 2040 për të përmbushur objektivat e saj të Iniciativës Neto Zero.
Me ekspertizën e Sllovakisë në energjinë hidroelektrike dhe bërthamore, Sakova tha se vendi i saj është i pozicionuar mirë për të mbështetur qëllimet energjetike të Türkiyes.
Sakova shtoi se ekonomitë e të dy vendeve mbështeten shumë në tregtinë e jashtme dhe furnizime të qëndrueshme energjetike, duke paralajmëruar se sfidat energjetike mund të përbëjnë probleme të rëndësishme jo vetëm për Sllovakinë, por për gjithë Evropën në të ardhmen e afërt.
“Ka një mundësi për të zhvilluar projekte të përbashkëta nga të cilat do të përfitojnë si Türkiye, ashtu edhe Sllovakia”, tha ajo, duke theksuar avantazhet e ndërsjella të bashkëpunimit më të ngushtë.
