Mijëra punëtorë në Britani të Madhe nisin grevë

Mijëra punëtorë në mbarë Britaninë e Madhe filluan një grevë katërditore për shkak të mosmarrëveshjeve lidhur me kushtet e punës dhe pagat e padrejta, transmeton Anadolu Agency (AA).

Udhëtarët në të gjithë vendin, përfshirë kryeqytetin Londër, do të përballen me probleme transporti pasi shërbimet e trenit, autobusit dhe metrosë do të pezullohen.

Punëtorët që kanë filluar grevë janë nga Rrjeti Hekurudhor, Transporti për Londrën, Autobusët e Londrës dhe shërbime të tjera transporti, si dhe anëtarë të një numri sindikatash, duke përfshirë Unionin Kombëtar të Trafikut Hekurudhor, Detar dhe Transportit (RMT).

"Network Rail nuk e ka përmirësuar ofertën e mëparshme të pagesës dhe kompanitë që operojnë trenat nuk na kanë ofruar asgjë të re. Drejtuesit e hekurudhave nëntokësore po zhvillojnë bisedime të fshehta me qeverinë për të ulur kostot duke shkurtuar vendet e punës dhe në dëm të kushteve të punës dhe pensioneve", tha shefi i RMT, Mike Lynch.

Ai shtoi se greva mund të çojë në pushime nga puna dhe një ulje prej 50 për qind të kapacitetit të punës.

Sekretari britanik i Transportit, Grant Shapps, dënoi grevën masive dhe fajësoi pjesëmarrësit e saj për shkaktimin e ndërprerjeve të panevojshme për miliona udhëtarë që shfrytëzojnë shërbimet e transportit të vendit për të shkuar në punë dhe për të vizituar familjen dhe miqtë.

Sindikatat që i prijnë grevës masive, megjithatë, pohojnë se punëtorët e tyre janë goditur rëndë nga kriza e kostos së jetesës me inflacionin që arrin nivele të larta prej 10 për qind dhe shkurtimet e pagave. Më tej, ata pohojnë se kushtet e këqija të punës rrezikojnë jetën e tyre.