Ekip
07 Dhjetor 2020•Përditësim: 07 Dhjetor 2020
Ministri i Mbrojtjes së Libisë, Salahaddin Namroush është kërcënuar me tërheqje nga marrëveshja e armëpushimit në Libi lidhur me praktikat e komandantit Khalifa Haftar, transmeton Anadolu Agency (AA).
"E paralajmërojmë OKB-në dhe vendet që mbështesin paqen se nëse ata nuk frenojnë kriminelin e luftës Haftar dhe ndalojnë pamaturinë e tij, ne mund të tërhiqemi nga marrëveshja ushtarake 5+5", tha Namroush në deklaratën e cituar nga Zyra e mediave të qeverisë "Operacioni Vullkani i tërbimit”.
"Do ta konsiderojmë armëpushimin të pavlefshëm nëse Haftar fillon ndonjë veprim ushtarak", paralajmëroi ai.
Të dielën, milicia e Haftarit sulmoi një kamp ushtarak në qytetin jugor Awbari, një lëvizje e gjykuar nga Këshilli i Lartë i Shtetit të Libisë si një shkelje e re e armëpushimit nga komandanti renegat në lindje të vendit.
"Ne pyesim përse OKB-ja dhe bashkësia ndërkombëtare heshtin ndaj veprimeve dhe kërcënimeve të Haftarit ndaj armëpushimit në jug të Libisë", tha Namroush.
Awbari, 964 kilometra në jug të Tripolit, ka një rëndësi strategjike duke pasur parasysh vendndodhjen e saj të ngushtë në fushën e naftës Sharara, që është më e madhja e vendit.
Më 23 tetor, OKB-ja njoftoi një marrëveshje të përhershme armëpushimi midis rivalëve ndërluftues të Libisë gjatë bisedimeve të Komisionit të Përbashkët Ushtarak Libian 5+5 në Gjenevë.
Libia është shkatërruar nga lufta civile që nga rrëzimi i sundimtarit të ndjerë Muammar Gaddafi në vitin 2011.
